看英文高手─阿滴仔 學台語的感想
廖啟助
拍開手機仔的youtube，雄雄跳出來→「密集學台語七天，跟阿嬤聊天他會發現嗎?」的影片出來，原來是英文足厲害，專門咧教人按怎學英文講英文的youtuber阿滴仔，這改想欲用一禮拜的時間來學台語，看家己的台語會當進步偌濟，以及想欲予伊的阿媽鑑定看伊這禮拜學的台語有進步無。
因為一个英文足厲害的gau5人，而且嘛定定去學外語的人，雄雄想欲轉來學台語，就引起我的興趣，想欲來看覓，伊的影片內面敢有講著啥物學台語的撇步，抑是伊的影片，敢會當感動觀眾朋友來鼓舞逐家做伙來學台語？我看了後，我發現伊的影片真正有予我感動，嘛有分享伊學台語的鋩角，所以我將我看了的感想整理出來佮逐家分享，希望對逐家有一寡仔幫贊。
佇阿滴仔紀錄伊學台語的影片內面，予我誠感動的就是─阿滴仔總算會當佮伊的爸母用台語開講，尤其是會當轉去陪阿媽用台語開講，對阿媽的表情佮阿滴仔開講的互動內面，會當去感受著阿媽歡喜的心情。
對這擺阿滴仔學台語的經驗，會當歸納出來下面幾个重點：
第一、學台羅，對無台語基礎的人來講，會當予家己日後看著羅馬字就有法度來讀出正確的發音，雖然一開始學台羅有可能會較困難，毋過頭過身就過，學台羅是真值得咱開時間來投資學習的項目佮能力。
第二、愛好好仔利用線頂的資源，尤其是教典抑是芋圓字典，來學字的發音，平常時仔加看較早的台語連續劇，親像「親戚不計較」，一面看一面綴咧講，學內面的人講話的氣口，嘛是真好的學習方式。
第三、欲予台語變好，「足講喙會順」是足重要的！定定講，一直講，而且愛主動揣厝內面會曉講台語的序大長輩來練習開講，抑是揣身軀邊仔會曉講台語的人做伙講，按呢會進步真緊，若是閣會當認真做筆記去查家己袂曉講的台語，訂目標而且用心去做去學習，其實佇有台語環境的台灣，欲予家己的台語進步，是真簡單的代誌！
第四、生活佇台灣這塊土地頂面，是需要撥一寡仔時間出來學習佮關心本土的語言，因為這个咱細漢聽到大漢的語言，內面有咱足濟的記持佮文化，咱若是有繼續使用這个本土語言，咱的記持佮文化就會當保留佮傳承落來，相對若是攏無人來講起，到尾仔這仔的記持佮文化就會無去消失去，這是真可惜真無彩的，所以除了愛學外語，嘛愛來共咱的本土語言學起來。
第五、厝內面的阿公阿媽，抑是爸爸媽媽若是會曉講台語，佇厝裡愛把握機會佮時間，佮囡仔抑是孫仔做伙講台語抑是本土語言，按呢大漢了後有這項本土語言能力，會予咱佇出社會加真有幫助，像伊的朋友就有講起，伊是一个演員，若是伊會曉講台語，就會當增加真濟演出的機會，所以若會當自細漢就共台語學起來，真正是足讚的投資，大漢了後嘛毋免閣愛另外開時間甚至開錢來學台語/本土語言。
最後，會曉講爸爸媽媽阿公阿媽的母語，真正會當共厝內面人的心更加搝做伙，會予序大人感覺加足感心的，所以希望所有有看著阿滴仔的影片的朋友，會當受著阿滴仔的鼓舞，對咱家己甚至是招閣較濟的朋友鬥陣來學台語，將台語抾轉來！
