散文 | 廖子晴 | 予阿爸ê生日卡片 (台文通訊 第387期 ) 佮予阿爸 爸爸節的祝福

今仔日是 115年8月8號 , 來佮逐家分享兩个佮我這个爸爸有關係的歡喜的代誌, 

第一項是細漢查某囝佇補習班翕予我的祝福

嘛佇遮祝福所有做爸爸的人 爸爸節歡喜~
而且毋若八八節這工，逐工攏愛歡喜閣健康喔💖

第2項是 大漢查某囝看我長期攏咧推廣台語, 寫台文, 

所以佇舊年伊專工用台文寫生日卡片予我,

我看了非常的感動,

就共伊寫的內容小si-á-geh,

共文章寄去台文通訊投稿
運氣真好,有錄取, 閣佇115年的6月份刊出來!
所以佮逐家做伙分享我的歡喜心情

(台文)予阿爸ê生日卡片

/ 廖子晴

祝福台灣上讚的台語推廣者 ——廖啟助先生，生日快樂！ 

 

予大圈肚的阿爸： 

        今仔日是我上愛的老爸的生日，6月初1是屬於你的日子。聽著你以早細漢過生日攏食粽，我感覺有一點仔毋甘。雖然你食甲足歡喜，毋過這馬無仝喔！有我、阿母佮妹妹做伙替你過生日，而且猶有你愛食的 cheese雞卵糕，按呢你是毋是更加歡喜、感動咧？ 

        會當做你的查某囝，我感覺真幸福嘛真感恩，因為我有足疼我的老爸。你會專工寫文章送予我，閣去投稿！毋若按呢，毋管你偌無閒，只要我需要去補習抑是去看醫生，你攏會撥工載我去，攏袂雜雜唸，希望你可以做我一世人的司機！ 

        愛共你說多謝的話實在是太濟矣，所以我欲「吩咐」你一寡重要的代誌： 

1. 毋通傷辛苦、莫啥物代誌攏家己來 
2. 愛對家己較好咧，食較好、穿較好、用較好咧 
3. 我永遠支持你、相信你 

最後，祝你49歲生日快樂，台語袂消失，I LOVE YOU～ 

By愛你的古錐子晴 

================================================================

 

(中文)給阿爸的生日卡片

/ 廖子晴

祝福台灣最讚的台語推廣者 ——廖啟助先生，生日快樂！ 

給大肚子的爸爸： 

今天是我最愛的爸爸的生日，6月1日是屬於你的日子。聽到你以前小時候過生日都吃粽子，我感覺有一點心疼。雖然你吃得很開心，不過現在不一樣囉！有我、媽媽和妹妹一起替你過生日，而且還有你愛吃的起司蛋糕，這樣你是不是更加開心、感動呢？ 

能當你的女兒，我感覺真幸福也很感恩，因為我有非常疼我的爸爸。你會特地寫文章送給我，還去投稿！不只這樣，不管你有多忙，只要我需要去補習或是去看醫生，你都會抽空載我去，都不會碎碎念，希望你可以當我一輩子的司機！ 

想對你說謝謝的話實在是太多了，所以我想要「吩咐」你一些重要的事情： 

1. 不要太辛苦、不要什麼事情都自己來 
2. 要對自己好一點，吃好一點、穿好一點、用好一點 
3. 我永遠支持你、相信你 

最後，祝你49歲生日快樂，台語不會消失，I LOVE YOU～ 

By愛你的可愛子晴 

 

 

散文 | 廖啟助 | 都市囡仔ê台語 嘛會當 siah-siah叫 (台文通訊 第383期 )

散文 | 廖啟助 | 都市囡仔ê台語 嘛會當 siah-siah叫

 

       現此時的台語，流失狀況非常嚴重，真濟囡仔毋若袂曉講，甚至連聽都袂輸是「鴨仔聽雷」，這款情形尤其是佇大都市的囡仔，特別明顯。我服務的學校，雖然是佇咱台灣上濟人講台語的高雄，毋過市區的囡仔嘛是有袂少人連聽都有困難，而且是真明顯佇仝年級的學生，愈後壁出世的年代，調查出來聽無的比例愈懸。是按怎會按呢？

       就我上課的統計，上主要的就是厝內面攏無人咧講台語，抑是序大人干焦會佮頂沿的爸母講一寡台語（嘛是定定透濫足濟華語佇內面），毋過翁仔某之間，抑是對囡仔、對孫仔輩差不多攏全華語咧溝通較濟。遮的囡仔，佇厝足罕得有機會，甚至是強欲完全無當聽人講台語，才會造成𪜶連基本的台語對話都聽無。

        我的學校佇正市中心的所在，國小加幼稚園的學生數差不多有2500个人，毋過佇下課的時陣，全校你去共揣，應該是揣無十个人用台語咧開講。佇這款學校環境，敢有法度培養學生，予伊講台語的能力進步，甚至予伊講甲足輾轉，佇全國語文競賽提著台語演說的特優咧？咱來做伙看覓仔，阮是按怎一步一跤印來達到這个目標！

        人講「有心開山，山成園;有心拍石，石成穿」，只要有心，任何目標總是有機會來達成！所以佇學生通過校內的台語演說比賽，取著代表權了後，我就主動甲伊的序大人加LINE聯絡，甚至連阿公阿媽嘛做伙搝入來組一个訓練講台語的群組。

        學生的阿公阿媽佮序大人本底就會曉講台語，毋過受大環境影響，慣勢佮囡仔講華語較濟，所以我第一項佮𪜶溝通的代誌，就是提昇𪜶講台語的意識。我共學生的厝內面人講，台語欲講會輾轉，上重要的就是愛先對厝內的長輩開喙講台語做起。

        囡仔聽了有夠濟，伊才有法度開喙講台語，而且因為有人佮伊對話，伊毋若有聽的刺激，閣較重要的是佇聽著了後，伊隨會當反應練習按怎用台語來表達、來佮人互動溝通。閣再來，咱厝內面的長輩，就親像是囡仔的台語家教老師仝款，當伊袂曉講，抑是講了重耽的時陣，會當佇邊仔隨時共輔導牽教，陪伴伊做伙學習成長。

        予厝內的大人先有台語意識，了解台語環境對提昇台語能力的重要性了後，我就請𪜶規厝內面人培養講全台語的習慣，因為按呢效果上好！拄開始大人嘛會轉袂過來，猶加減會用華語來講，毋過透過指導老師的提醒鼓勵，大人就愈來愈慣勢講台語，大人囡仔同齊進步，做伙共台語抾轉來兼提昇表達能力。

        囡仔佇厝講台語的時間佮機會綴咧愈來愈濟，會曉講的詞彙就一直咧增加，仝款的意思開始有法度用無仝的語詞講法來表達，聲調嘛愈講愈自然，甚至佇講的過程當中，自然學會曉變調。 為著欲予𪜶規厝內面人的台語地基緊鞏予在，我佇群組佮𪜶對話，大部份攏拍台文予𪜶看佮讀，閣鼓舞𪜶去參加教育部的台語認證考試，𪜶真認同我的建議，規口灶——阿公、阿媽、老爸、老母加囡仔，五个人做伙去報名，真正予我足感動！尤其是72歲的阿媽，加減會佇群組練拍台文。這款行動力，予我感覺辛苦付出足有成果嘛足感心的！

       創造台語家庭環境了後，囡仔的台語底蒂就慢慢仔有基礎矣。這个時陣老師加強指導，親像：抽著題目了後，欲按怎準備演講的內容重點、鋪排演講的結構，閣有學習欲按怎有理路來回答評判老師的提問等等的能力。

        另外，因為囡仔本身真肯學、耐操閣足骨力練，爸母佮阿公阿媽非常認真配合老師的要求，全家總動員，用心陪伴伊做伙綿櫼練習，老師、所有的親情，攏予伊真大的鼓勵佮祝福，加上天公伯仔的疼痛，予伊真順利，一路對縣市的分區賽、市決賽，一直拚到全國語文競賽，一路過關斬將，最後得著『特優兼生動自然獎』遮爾好的表現！

        人講「番薯毋驚落塗爛」，雖然現此時社會的本土語意識佮講母語的環境無界好，毋過只要咱有堅心，有正確的理念，願意徛出來，用時間費精神佮家長學生溝通，提昇𪜶的台語意識，爭取𪜶的認同，親身做予𪜶看，有共同的目標，鬥陣欲共台語抾轉來，規家伙佮老師同齊做伙拚，都市囡仔的台語嘛會當共教甲siah-siah叫喔！

=====================================================================

【中文版】

現在的台語，流失狀況非常嚴重，許多孩子不僅不會說，甚至連聽都像是「鴨子聽雷」，這種情況尤其是在大都市的孩子，特別明顯。我服務的學校，雖然是在我們台灣最多人說台語的高雄，但市區的孩子也是有不少人連聽都有困難，而且很明顯在同年級的學生，愈後面出生的，調查出來聽不懂台語的比例愈高。為什麼會這樣？

就我上課的統計，最主要的原因就是家中都沒有人在說台語，或做爸媽的只有和上一輩的父母說一些台語（也是常參雜很多華語在裡面），但夫妻之間，或對孩子、對孫子輩差不多都全華語在溝通較多。這些孩子，在家裡很難得有機會，甚至是快要完全聽不到有人說台語，才會造成他們連基本的台語對話都聽不懂。

我的學校在正市中心的地方，國小部加上幼兒園的學生差不多有2500個人，但在下課的時候，你去全校尋找，應該是找不到十個人用台語在聊天。在這樣的學校環境，有沒有辦法能培養學生，讓他說台語的能力進步，甚至讓他說得很流利，在全國語文競賽取得台語演說的特優呢？咱們來一起看看，我們如何一步一腳印來達到這個目標！

人家說「有心開懇山林，山林可變成林園;有心打鑿石頭，石頭也可鑿穿」，只要有心去努力，任何目標總是有機會來達成！所以在學生通過校內的台語演說比賽，取得代表權後，我就主動和他的父母親加LINE聯絡，甚至連爺爺奶奶也一起拉進來組一個訓練說台語的群組。

學生的爺爺奶奶和長輩本來就會說台語，但受大環境影響，習慣了和孩子說華語較多，所以我第一項和他們溝通的事情，就是提昇他們說台語的意識。我對學生的家人說，台語要說得流利，最重要的就是要先從家裡的長輩開口說台語做起。 孩子聽了夠多，他才有辦法開口說台語，而且因為有人和他對話，伊不只有聽的刺激，更重要的是在聽到之後，他立即可以反應練習如何用台語來表達、來和人互動溝通。再來，我們家裡面的長輩，就像是小孩子的台語家教一樣，當他不會說，或說得不正確的時候，可以在一旁隨時給予輔導教導，陪伴他一起學習成長。 讓家裡的大人先有台語意識，了解台語環境對提昇台語能力的重要性之後，我就請他們全家人培養說全台語的習慣，因為這麼效果最好！剛開始大人也會切換不過來，還多少會用華語來說，但透過指導老師的提醒鼓勵，大人就越來越習慣說台語，大人小孩同時進步，一起把台語撿拾回來並提昇表達能力。 孩子在家中說台語的時間和機會跟著越來越多，會說的詞彙就會一直增加，一樣的意思開始有辦法用不同的語詞說法來表達，聲調也越說愈自然，甚至在說的過程當中，自然學會變調。 為了要趕緊把他們全家人的台語地基紮穩，我在群組和他們對話，大部份都打台文給他們看和唸，再鼓勵他們去參加教育部的台語認證考試，他們很認同我的建議，全家人—爺爺、奶奶、父親、母親與孩子，五個人一起去報名，真的讓我很感動！尤其是72歲的奶奶，加減會在群組練打台文。這種行動力，讓我覺得辛苦付出很有成果也很感動！ 創造台語家庭環境之後，小孩子的台語根基就慢慢地有基礎了。這個時候老師加強指導，像：抽中題目後，要如何準備演講的內容重點、鋪排演講的結構，還有學習要如何有條理的回答評判老師的提問等等的能力。

另外，因為孩子本身很肯學、耐操並很努力練習，父母和爺爺奶奶非常認真配合老師的要求，全家總動員，用心陪伴他一起勤奮練習，老師、所有的親戚，都給他很大的鼓勵和祝福，加上老天爺的疼愛，讓他很順利地，一路從縣市的分區賽、市決賽，一直力拚到全國語文競賽，一路過關斬將，最後獲得『特優兼生動自然獎』這麼好的表現！ 有人說「蕃薯不怕生長在爛泥巴」，雖然現在社會的本土語意識和說母語的環境不大好，但只要我們能堅定信心，有正確的理念，願意站出來，用時間費心思和家長學生溝通，提昇他們的台語意識，爭取他們的認同，親自做給他們看，有共同的目標，一起要把台語撿拾回來，全家人和老師一齊努力拚博，都市孩子的台語也可以把它練到頂呱呱哦！

線頂完整的台文通訊BONG報 383期，2026年2月出刊 雜誌內文

請點後面連結~https://tsbp.tgb.org.tw/2016/02/lanmai-e-ma-e-tang-siah-siah.html

期待您看過我的分享之後, 也能和我分享交流您的想法, 感恩~

你知道台語也有獨特又流傳已久的美麗詞彙嗎 👀

散文 | 廖啟助 | 推捒台語，導師來鬥tshuā (台文通訊 第381期 )

 

 推捒台語，導師來鬥tshuā (台文通訊 第381期 )

 「台文版」 (對應朗讀請點我)

作者：廖啟助

      今仔下晡放學行過運動埕的時，2个6年的查某學生囡仔，對我的後壁用台語佮我拍招呼：「老師你好」！我毋知是啥人咧共我問好，我越過頭對in講：「恁好，恁的台語講了足好聽喔！」 In講：「因為阮老師最近每一工透早攏會tshuā規班讀台語。」我講：「有影無，恁老師是啥人？」

       In講就某mí老師，閣講後禮拜一的時，伊欲叫in規班每一个人起去台仔頂唸台語課文，害in攏足緊張。我講：「哇！按呢有夠讚的呢，若是每一个tshuā班的導師攏會當按呢做，按呢咱的台語就有向望，免煩惱矣！」

        這位導師我過去佮伊接接的時，伊攏會用台語佮我開講，予我知影伊嘛是台語底的，只是因為大環境的影響，閣有工課的關係，予伊平常時仔較罕得講台語。

        了後，我去教in班的台語課的時，我就攏會鼓舞學生囡仔，下課有閒的時，盡量招同學做伙講台語，甚至是會當去佮導師開講，因為「恁導ê的台語講了足好ê，而且伊的台語的聲調氣口，講了比啟助老師閣較好聽、閣較媠喔！，所以老師建議恁，有閒的時會當盡量去揣恁導ê開講，若有按呢去做，相信恁的台語一定會進步足緊的！」

       然後佇下課的時，我專工行過去佮導師a̋i-sat-tsuh ，一來是肯定導師的台語真正講了足好聽，二來是拜託導師若有閒的時，盡量會當佮囡仔加講寡台語。甚至平常時教課，毋管是國文、數學、美術、綜合課程抑是班級經營......攏會當加減透濫寡台語來教囡仔，予囡仔會當佇毋是台語課的時，嘛會當來聽著其他的老師講台語，用台語來教其他的科目。

予囡仔知影：台語毋是干焦台語課的台語，台語是會當用來佇生活中佮人溝通佮學習其他科目的語言，台語是咱的共同生活語言。

  　 後來，我嘛捌聽in班的學生共我講起，講in導仔捌佇數學課用台語佮in開講，嘛用台語來教數學，彼咧時陣就予我真感動，因為這位老師真正有共我講的話囥佇心肝內，而且閣真正佇伊的教學中來實踐。

    　最近因為我欲考囡仔的台語口語測驗，我知影一般的囡仔下課了後，尤其是轉去厝了後，無可能會提台語課本出來複習的，所以我私底下拜託導師鬥相共，鼓舞佮提醒學生囡仔愛撥工來複習台語。

想袂到這位老師，毋是干焦用喙共我凊彩答應，叫囡仔複習爾爾，閣是親身利用每一工透早8點到8點半這段時間，親身tshuā規班做伙讀台語，做伙來餾台語，聽了真正是予我非常非常的感動，嘛予我非常非常的歡喜。

因為咱有主動佮導師溝通，邀請導師鬥陣佮我合作，請in鬥相共來做伙推捒台語，就真正會當予台語對干焦佇台語課的教學，慢慢仔湠來其他毋是台語課的導師時間佮數學課來釘根傳承。

聽著按呢的好消息，予我真期待後禮拜囡仔佇台語口語測驗的表現矣。當然嘛一定愛來攢一杯大大杯的咖啡，好好仔來答謝這位老師遮爾用心，願意費精神佮我做伙來推捒台語。💞

線頂完整的台文通訊BONG報 381期，2025年12月出刊 雜誌內文

請點後面連結~https://tsbp.tgb.org.tw/2015/12/tshui-sak-tau-tshua.html

「中文版」

今天下午放學經過運動場的時候，兩個六年級的女學生，從我的背後用台語和我打招呼說：「老師你好」！我不知道是誰跟我打招呼，我轉過頭對他們說：「你們好，你們的台語說得很好聽喔！」他們說：「因為我們老師最近每天早上都會帶我們全班讀台語。」我說：「真的嗎？你們的老師是誰？」

 　　他們說就是某某老師，還說下禮拜一的時候，他要叫他們全班每個人上去台上唸台語課文，害他們都很緊張。我說：「 哇！這樣有夠讚的，如果每一個帶班的導師都可以這樣做，這樣我們的台語就有希望，不用擔心了！」

 　　這位導師我以前跟他接洽的時候，他都會用台語跟我聊天，讓我知道他也是以台語為母語的人，只是因為大環境的影響，還有工作的關係，讓他平時比較少講台語。

 　　之後，我去教他們班的台語課的時候，我就會鼓舞學生，下課有空的時候，盡量和同學一起說台語，甚至可以去和導師聊天，因為「你們導師的台語說得很好，並且他的台語聲調口氣，說得比啟助老師更好聽、更漂亮喔！所以老師建議你們，有空的時候可以盡量去找你們導師聊天，如果有這樣去做，相信你們的台語一定會進步的很快！」

 　　然後在下課的時候，我專程走過去跟導師打招呼，一來是肯定導師的台語真的講得很好聽，二來是拜託導師若有空的時候，盡量可以跟孩子多講一些台語。甚至平時教課，不管是國文、數學、美術、綜合課程或是班級經營……都可以多少混合一些台語來教孩子們，讓孩子們可以在不是台語課的時候，也可以聽到其他的老師說台語，用台語來教其他的科目。

 　　讓孩子知道：台語不只是台語課的台語，台語是可以用來在生活中與人溝通與學習其他科目的語言，台語是我們的共同生活語言。

 　　後來，我也曾聽他們班的學生跟我說起，說他們班導師曾在數學課用台語和他們聊天，也用台語來教數學，那個時候就讓我很感動，因為這位老師真的有把我說的話放在心裡面，而且真的在他的教學中來實踐。

 　　最近因為我要考學生的台語口語測驗，我知道一般的小孩下課後，尤其是回家之後，不可能會拿台語課本出來複習的，所以我私底下拜託導師幫忙，鼓勵並提醒學生要撥空複習台語。

 　　想不到這位老師，不只是用嘴巴隨便答應我叫孩子複習而已，卻是親自利用每一天早上八點到八點半這段時間，親自帶全班一起讀台語，一起來複習台語，得知老師的作為，真的是讓我非常非常的感動，也讓我非常非常開心。

 　　因為我們有主動跟導師溝通，邀請導師一起跟我合作，請他們幫忙來一起推動台語，就真的可以讓台語從原本只有在台語課的教學，慢慢地擴展到其他不是台語課的導師時間和數學課來紮根傳承。

 聽到這樣的好消息，讓我很期待下禮拜孩子在台語口語測驗的表現了。當然也一定要來準備一杯大大杯的咖啡，好好答謝這位老師這麼用心，願意花費精神跟我一起來推廣台語。💞

看英文高手─阿滴仔 學台語的感想 廖啟助

看英文高手─阿滴仔 學台語的感想

 廖啟助

         拍開手機仔的youtube，雄雄跳出來→「密集學台語七天，跟阿嬤聊天他會發現嗎?」的影片出來，原來是英文足厲害，專門咧教人按怎學英文講英文的youtuber阿滴仔，這改想欲用一禮拜的時間來學台語，看家己的台語會當進步偌濟，以及想欲予伊的阿媽鑑定看伊這禮拜學的台語有進步無。

        因為一个英文足厲害的gau5人，而且嘛定定去學外語的人，雄雄想欲轉來學台語，就引起我的興趣，想欲來看覓，伊的影片內面敢有講著啥物學台語的撇步，抑是伊的影片，敢會當感動觀眾朋友來鼓舞逐家做伙來學台語？我看了後，我發現伊的影片真正有予我感動，嘛有分享伊學台語的鋩角，所以我將我看了的感想整理出來佮逐家分享，希望對逐家有一寡仔幫贊。

       佇阿滴仔紀錄伊學台語的影片內面，予我誠感動的就是─阿滴仔總算會當佮伊的爸母用台語開講，尤其是會當轉去陪阿媽用台語開講，對阿媽的表情佮阿滴仔開講的互動內面，會當去感受著阿媽歡喜的心情。

        對這擺阿滴仔學台語的經驗，會當歸納出來下面幾个重點：

第一、學台羅，對無台語基礎的人來講，會當予家己日後看著羅馬字就有法度來讀出正確的發音，雖然一開始學台羅有可能會較困難，毋過頭過身就過，學台羅是真值得咱開時間來投資學習的項目佮能力。

第二、愛好好仔利用線頂的資源，尤其是教典抑是芋圓字典，來學字的發音，平常時仔加看較早的台語連續劇，親像「親戚不計較」，一面看一面綴咧講，學內面的人講話的氣口，嘛是真好的學習方式。

第三、欲予台語變好，「足講喙會順」是足重要的！定定講，一直講，而且愛主動揣厝內面會曉講台語的序大長輩來練習開講，抑是揣身軀邊仔會曉講台語的人做伙講，按呢會進步真緊，若是閣會當認真做筆記去查家己袂曉講的台語，訂目標而且用心去做去學習，其實佇有台語環境的台灣，欲予家己的台語進步，是真簡單的代誌！

第四、生活佇台灣這塊土地頂面，是需要撥一寡仔時間出來學習佮關心本土的語言，因為這个咱細漢聽到大漢的語言，內面有咱足濟的記持佮文化，咱若是有繼續使用這个本土語言，咱的記持佮文化就會當保留佮傳承落來，相對若是攏無人來講起，到尾仔這仔的記持佮文化就會無去消失去，這是真可惜真無彩的，所以除了愛學外語，嘛愛來共咱的本土語言學起來。

第五、厝內面的阿公阿媽，抑是爸爸媽媽若是會曉講台語，佇厝裡愛把握機會佮時間，佮囡仔抑是孫仔做伙講台語抑是本土語言，按呢大漢了後有這項本土語言能力，會予咱佇出社會加真有幫助，像伊的朋友就有講起，伊是一个演員，若是伊會曉講台語，就會當增加真濟演出的機會，所以若會當自細漢就共台語學起來，真正是足讚的投資，大漢了後嘛毋免閣愛另外開時間甚至開錢來學台語/本土語言。

最後，會曉講爸爸媽媽阿公阿媽的母語，真正會當共厝內面人的心更加搝做伙，會予序大人感覺加足感心的，所以希望所有有看著阿滴仔的影片的朋友，會當受著阿滴仔的鼓舞，對咱家己甚至是招閣較濟的朋友鬥陣來學台語，將台語抾轉來！

散文 | 廖啟助 | 有緣才會做親人， 包容創造幸福ê人生 (台文通訊 第379期 )

 

《有緣tsiah ē做親人，

包容創造幸福ê人生》/廖啟助

古早人咧講：「無冤無家，不成夫妻」。 前世若無相欠債，這世嘛袂做夫妻。會做厝內面人抑是親情(tsiânn)，攏是過去世有真深的因緣，尤其是可能過去有互相虧欠，才有這世ê緣份。

        人佮人的鬥陣，因為外口人無一定會吞忍--咱，加上對外，咱一般人攏會希望維持一个好的形象，所以咱往往(óng-óng / íng-íng)攏會對外口人加(ke)真客氣！毋過，若是下班抑是下課轉來到厝，因為是厝內面人，咱佮人的互動就會變做真直接，無閣戴一个小(siáu)鬼仔殼，定定(tiānn-tiānn)講話抑是做代誌就較袂去顧慮對方的感受，無閣遐爾(hiah-nī)客氣，這个時陣就會造成衝突無爽快！

       厝內面人若是khí-mooh-tsih無拄好的時，毋管伊是囡仔、翁某、序大人，抑是其他的親情(tsiânn)，若是對方予咱受氣，咱應該共看做是咱咧將過去虧欠伊的部分還--伊，毋是對方咧共咱糟躂(tsau-that)抑是揣麻煩，閣較莫想欲去討--轉來，按呢咱的心情就較袂受影響嘛較會自在。

        世界上無人是十全十美--的，人人攏有缺點，銀角仔無兩ê袂霆(tân)，無的確是咱先去觸(tshik)著人的意，抑是咱先講話聲嗽無好，內容傷薟(siunn hiam)、傷鹹、傷利，才會予對方擋袂牢(bē tiâu)，人才會變(pìnn)面佮咱冤家。所以若是遇著佮厝內面人起毛䆀(khí-moo bái)的時，咱無需要去爭輸贏，龜跤龜內肉，平平攏是厝內面人，拍甲對方受傷，家己嘛會損著筋骨，無人會總贏，家和才會萬事興，家亂萬世窮。  

       人講受氣就是提別人ê錯誤咧處罰家己，而且氣死是驗無傷，所以咱愛學較巧--咧，人生在世ê時間只有短短ê 3萬外日，每過一工，美好的生命就減少一工。所以咱愛好好仔珍惜，對家己較好--咧，凡事看予開，歡喜上重要；前跤欲行，後跤就愛放，想欲有幸福的日子，就愛將過去無爽快的代誌放下，咱才有法度行向美好的未來。

佇地球頂面，現此時有超過82億人，咱愛有足深的緣份才會來做親人。若有無歡喜的代誌，愛想起古早人的智慧：「相分食有賰，相搶食無份」。先小讓--一下，先檢討調整家己的缺點，包容別人做無好的所在，特別是對咱上親的人，咱閣較愛共上好的笑容佮態度留予in才著。當當(tng-tong)咱有退一步，對方嘛會感受著咱的好意，人佮人的鬥陣就會愈來愈峇(bā)，生活愈來愈好。來成做一个有福氣的人，過幸福的人生，咱互相勉勵求進步喔！

線頂完整的台文通訊BONG報 379期，2025年10月出刊 雜誌內文

請點後面連結~https://tsbp.tgb.org.tw/2015/10/e-tsiah-e-e.html

詩 | 廖啟助 | 精彩ê15歲 (台文通訊 第377期 )

        我毋是一个文學家，嘛無讀啥冊，所以無法度像一寡大作家有才調去寫足濟優美ê語詞，干焦會當用足淺白ê話語來紀錄我ê生活；雖然我ê文筆無夠好，毋過我有真用心去感受佮體會家己ê生活，尤其是對厝內面人佮對家己ê教育工作。當當若是對這項代誌特別有感動ê時，就會盡量撥工揣時間共心肝頭ê一寡感動整理落來。 

真感謝台文通訊ê編輯老師，對我這个做阿爸的人ê疼痛，願意將我陪伴查某囝成長過程ê體會佮紀錄刊登出來，誠懇邀請所有ê好朋友做伙來讀看覓，無的確你會發現，原來「天下爸母心」這句話真正是真ê喔~ 

為啥物啟助會按呢講，請你來讀我這首「精彩的15歲」，毋管你是做人ê序大長輩，抑是做人ê囝兒序細，只要將你ê生活記持佮我所寫ê內容小比對一下，相信你就會知喔~ 

    【精彩ê15歲】朗讀(請點我)

01.勻勻仔ûn-ûn-á 慢慢地、謹慎小心地。

02.熬gô 用小火慢慢烹煮食物。

03.褒嗦po-so 恭維。用正面、肯定的言語對別人稱讚、誇獎。

04.小可仔sió-khuá-á 稍微、些微、少許。 

誠懇邀請所有來看我ê作品ê來賓，毋管你是寫中文抑是台文，攏歡迎你留話將你讀了「精彩ê15歲」ê想法佮阮分享喔! 

線頂完整的台文通訊BONG報 377期，2025年8月出刊 雜誌內文
請點後面連結~https://tsbp.tgb.org.tw/2015/08/e-15.html

散文 | 廖啟助 | 聽〈阿母的話〉這首歌ê感動 (台文通訊 第375期 )

因為真佮意農村武裝青年，所以專工tshuā阿爸阿母來高雄駁二特區聽in的現場演唱會

           佮主唱兼吉他手阿達仔做伙翕相

           ps. 下面文章的字若是黃色的字就是有超連結，有台語辭典的解說，歡迎點入去看喔~

聽〈阿母的話〉這首歌的感動

 

作者：廖啟助

 

        自查某囝出世，我就想欲共「阿公阿媽講的話」好好仔傳予囡仔。有一擺，我無意中去聽著「農村武裝青年」佇成功大學「跤踏土地唱民謠」演唱會內面演唱的〈阿母的話〉這首歌，若親像是透過主唱兼吉他手阿達仔的喙來講出我的心聲。我這个做老爸的人，那聽阿達仔的分享目屎那流。你講敢有遮譀？無毋著，就是予我遮爾感動，請你沓沓仔聽我說明，是按怎我會遮爾仔感動。

 

        我是佇台南龍崎大漢的庄跤囡仔，自細漢毋但厝內面人攏講台語，會使講是規个庄頭，甚至是規个鄉鎮的人攏是全台語咧佮人溝通接接，所以我就佇遮爾純的台語母語環境大漢。毋過，後來退伍了後到高雄教冊食頭路的時，身邊講台語的人無濟，有咧講的人，嘛是攏透濫華語咧講較濟，我無意中嘛開始綴in講華語。

       

        歇睏的時轉來台南厝裡佮阿爸阿母抑是阿公阿媽開講的時，煞變做足濟台語語詞開始袂記得愛按怎講。講台語的時，喙舌攏會拍結、袂輾轉，愛停落來問序大人這个語詞按怎講，才有法度閣用台語講落去。所以差不多20冬前，我開始有意識提醒家己盡量用台語佮人接接溝通，來保持家己的台語能力。

 

      因為蹛庄跤，序大人無特別注重我的課業，細漢的時攏咧𨑨迌，啊無，就是去田裡鬥相共較濟。加上厝內環境無好，無啥物教育資源，就算阮班干焦7个人，我的成績猶是按尾仔算來前3名較濟，我佇學校考試的成績一直攏無好！自國小差不多三四年以後，才意識著成績bái這項代誌，一直到讀大學的時，我對家己的表現，攏有真深的自卑！

 

佇民國99年彼冬的「國語文」競賽，我聽著教學組長講，目前「國語」的比賽項目，同事攏報滇矣，毋過台語演講這項無人報，敢有人欲來報名？啥物！我敢有聽毋著？全國的語文競賽，竟然有台語的比賽項目，閣拄仔好演講這項無人參加，我就青盲毋驚銃，殘殘主動去報名，代表學校比賽。

想袂到我頭擺去比賽，就予我得著全高雄市教師組的第一名，這對一个自細漢佇庄跤大漢、自卑的我來講，是有夠大的肯定佮鼓舞，講台語的庄跤囡仔嘛有出頭天的一工！自彼時開始，我叫家己愛疼惜台語，共咱的母語傳承落去，就按呢，我費心、用心教家己的囡仔講台語。

 

         我足希望阮查某囝會曉講in阿公阿媽佮我講的話，所以自伊出世開始學講話，我就攏全台語咧佮查某囝講話；毋過阮太太的母語毋是台語，所以伊佮查某囝講華語。因為身邊大部分的人對阮查某囝講華語，干焦我這个老爸講台語，伊tsua̋nn變做無啥 愛講台語。為著欲繼續傳承台語，只要伊講一句華語，我就佇邊仔隨講一句台語，予伊知影這句華語若換做台語欲按怎講。

        有一擺我為著欲教囡仔講台語，要求查某囝愛講台語，伊煞共我應講：「阮同學啊無人咧講台語，是按怎阿爸你就愛遐堅持叫阮講台語？」聽著伊按呢共我應，我的心內佮阿達仔仝款，煩惱阮查某囝是毋是認為「講母語是一項真見笑的代誌」，感覺「是按怎咱兜講的話會佮人無仝？」

 

 太太看阮舞甲爸仔囝起衝突，無愛看阮拍歹感情，伊開喙講：「是按怎你愛遐堅持叫囡仔講台語？我嘛無咧講台語，毋是仝款過了好好？你為著欲教囡仔講台語，舞甲爸仔囝相罵，按呢敢有必要？敢有價值？」後來我只好讓步，無閣堅持叫囡仔一定愛開喙講台語，干焦用好喙、用參詳、用姑情的方式，叫in盡量會加講寡台語，我仝款家己一个人堅持講台語予in聽。

 

長期落來兩个囡仔猶是真罕得佇我的面頭前講台語，坦白講，對我這个逐工想欲共母語傳予in的老爸來講，心內一直攏是傷痕，痛甲無人知，身邊的人攏無法度體會佮了解，甚至予我感覺心肝若像有一部分已經強欲焦去矣！為著欲予囡仔有法度來做伙講台語，我嘛捌去請教幾个教授抑是其他資深的台語老師，問in有啥物撇步通來改善這个狀況。

In予我的答案佮建議攏差不多是：叫我寬寬仔來、莫急嘛莫勉強囡仔一定愛按怎，因為「硬挽的果子袂甜」，相信時間一下久，囡仔的表現自然會改善。看著遮濟教授佮老師攏按呢共我鼓舞佮建議，我嘛只好放下，叫家己順其自然，慢慢等待花開的彼工。

 

我繼續堅持逐工佇囡仔身邊佮in全台語講話，嘛做模範予我的囡仔看，一直充實家己，讀台文提專業級的認證、去參加演講比賽、寫文章投稿、參加教育部辭典編輯培訓、本土語言意識培力培訓、做宣講師、四界去演講、到真濟縣市做評審、做伙去演台語廣播劇、參加台語有聲冊錄音，尾仔甚至改途做台語老師。我一直關心、鼓舞身邊的人鬥陣講台語，會使講規个心攏佇傳承母語頂面。

 

囡仔看我做這爾濟台語工課，應該知影我向望共母語傳落去。大漢查某囝捌代表學校參加台語演講比賽，甚至佇國中的時捌提著市賽第三名。伊去參加教育部B卷的台語認證考試，完全無準備，一擺就通過B1中級，甚至差10外分就到B2的程度。細漢查某囝嘛有代表學校去比台語朗讀，學校的台語老師嘛共我呵咾講伊是in班台語課表現上好的學生。看著兩个囡仔的表現，我知影我這个阿爸平常時逐工對in講的話，in攏有囥佇心肝內佮頭殼底。

 

這馬聽著〈阿母的話〉這首歌，予我想起大漢查某囝有一工佇line寫予我訊息，伊講：

恭喜阿爸你的台文寫作投稿又閣錄取矣😚！

我感覺厝內面人會當做伙分享歡喜的代誌是足讚的~ 

純文字沒啥溫度，毋過我發自內心替阿爸歡喜喔~

雖然我平常時仔攏無咧講台語，

毋過我支持你對台語的貢獻和參與。

加油~衝衝衝❤️‍🔥❗

你定定鼓勵我，所以我嘛欲替你加油！

想起查某囝這ê共阿爸鼓舞的話，予阿爸知影，你袂感覺阿爸對你講母語是見笑代，嘛袂感覺講阿爸一直咧講台語會予你感覺真歹勢。你閣支持阿爸去參與對台語有貢獻的種種活動，阿爸有沓沓仔去感受著，原來我過去佇恁的心內tiàm的台語種子，嘛已經慢慢咧發穎開花矣！

 

若是看我的文章了後, 有一寡想法，歡迎你佇下面留話予啟助，多謝。💞

線頂完整的雜誌內文， 請點台文通訊BONG報 375期，2025年6月出刊 的超連結來欣賞喔~