鳳山區 中山國小 談交通安全教育的重要性 112.04.12
主任班同學佇中山國小服務，伊有聽in生教組長講我分享的「交通安全教育」內容袂䆀，所以伊就敲電話邀請我去in學校分享。有人無棄嫌我，願意予我有機會去分享，我當然足珍惜按呢的機會。中山國小的老師攏足認真學習，來參與進修的出席率誠懸，而且佇我問問題的時，真濟老師攏足大方嘛足認真佮我有交流對話，連校長嘛是自頭坐到尾，坐佇上頭前聽我分享，真正足感心的~
真濟老師，包括校長在內，對我所分享的影片內容抑是講課的內容，攏真有感受，有體會著原來：交通安全教育絕對毋是干焦教囡仔「紅燈停、青燈行」遮爾簡單的代誌，有足濟幼路的所在愛提醒咱的學生囡仔抑是厝內面人，我嘛藉機會紹介「靖娟基金會」予中山國小的老師認捌，予逐家了解in佇交通安全教育的投入佮用心，校長聽了我的介紹了後嘛真肯定，想欲請學務處佮靖娟基金會來聯繫，看欲按怎將志工佮靖娟來合作，將阮四維做了好的部分，推展到中山國小。
另外，這擺我除了佮頂擺仝款，全程至少用95%以上的台語來演講分享以外，我佇我的簡報頂面，專工揣一寡字較少的內容，共台語漢字拍佇頂面，予老師除了會當聽著我的台語分享，閣會當看著台語文出現的教師進修的場合，看著我按呢的安排，真濟坐佇下面的老師看著螢幕頂面的台語漢字，目睭攏金起來。下課的時，校長抑是幾位老師攏來問我敢是有咧教台語，抑無我的台語nài有法度講甲遮輾轉？我想我刁工用這步出來演講分享交通安全教育的重要性，閣兼共台語以及台語字推捒出來的做法，已經有開始產生一寡效果矣。向望有愈來愈濟的老師，做伙來關心囡仔的交通安全教育，嘛做伙關心台語欲滅亡的嚴重性，做伙佇生活中用台語溝通佮書寫表達，相信只要逐家有按呢的體會佮行動，交通安全教育佮台語的發展一定會愈來愈進步，予咱愈來愈放心~
ps. 若是其他的學校有需要啟助去分享，我攏足願意去你的學校分享喔! 予咱做伙來關心囡仔的交通安全教育, 以及將好聽的台語講予閣較濟的老師佮朋友聽~
