●佮逐家分享一寡我所看著的好資料 ~有任何想法,歡迎留話給我^^ ●文圖影音等相關資料，純教學分享， 若有侵權煩請留言告知，必立即移除，感謝您的包容與無私分享~
恭禧我的徒弟仔~黃群皓 得著全國語文競賽台語情境式演講「特優兼生動自然獎」
欲得著這个獎項，講正經的，是真無簡單，因為愛一路佇縣市的分區賽、市決賽，一直拚到上尾仔的全國語文競賽，一路過關斬將，最後才有法度提著這个獎項！
這个指導訓練過程雖然真辛苦，嘛付出足濟時間佮精神，毋過，今年運氣真好，遇著一个足肯學的徒弟仔，而且伊耐操閣足骨力練，加上厝內面的爸母佮阿公阿媽非常認真配合老師的要求，全家總動員做伙講台語，營造一个台語的母語家庭環境，規厝內面人攏足用心陪伴伊做伙綿精練習，身軀邊仔的老師抑是厝裡的所有親情，攏予伊真大的鼓勵佮祝福，閣加上天公伯仔的疼痛，才予伊會當真順利來得著「特優兼生動自然」這个獎項，再次恭禧群皓有遮爾好的表現！
相信有按呢的成功經驗，佇伊的心內一定有去體會著，我這个師父想欲共「講台語、愛台語、捒台語」的種子tiàm佇伊的心內的期待，相信以後一定會當發穎開花，佮我這个師父仝款，鬥陣來推捒台語的傳承~
非常感謝雋妍媽媽佮雋妍遮用心，佇雋妍拄完成英國的碩士學業，ta̋nn轉來台灣無幾工，想著教師節欲到矣，專工撥時間來高雄揣我看我！看著囡仔毋但足有成就，閣將咱囥佇心內，願意撥工來相揣坐，真正予我這个做「師父」的人，感覺足光彩的~
看著學生佇畢業20冬後，閣會想欲轉來揣我，就是予我這个做老師的人，上大的肯定佮鼓勵，多謝雋妍佮雋妍媽媽來共師父充電喔~
我毋是一个文學家，嘛無讀啥冊，所以無法度像一寡大作家有才調去寫足濟優美ê語詞，干焦會當用足淺白ê話語來紀錄我ê生活；雖然我ê文筆無夠好，毋過我有真用心去感受佮體會家己ê生活，尤其是對厝內面人佮對家己ê教育工作。當當若是對這項代誌特別有感動ê時，就會盡量撥工揣時間共心肝頭ê一寡感動整理落來。
真感謝台文通訊ê編輯老師，對我這个做阿爸的人ê疼痛，願意將我陪伴查某囝成長過程ê體會佮紀錄刊登出來，誠懇邀請所有ê好朋友做伙來讀看覓，無的確你會發現，原來「天下爸母心」這句話真正是真ê喔~
為啥物啟助會按呢講，請你來讀我這首「精彩的15歲」，毋管你是做人ê序大長輩，抑是做人ê囝兒序細，只要將你ê生活記持佮我所寫ê內容小比對一下，相信你就會知喔~
雖然我關心推捒台語真濟冬矣，毋過因為過去攏是教資優班抑是社會科，所以雖然捌鬥相共指導學生，毋過人數並無濟，若是親身正式掛名落去指導學生參加台語演講的學生，今年可能只是第3个抑是第4个學生爾爾。
今年的指導學生，是一个4年的同學， 年紀雖然有較細，毋過因為學生的厝內面人有配合， 規家伙仔盡量營造出台語家庭的環境，加上學生肯練，家長用心配合要求訓練，以及導師鬥相共，才有今仔日的好成果！
看著學生會當提第一名，嘛是我指導學生演講以來第一个提著第一名的學生，雖然只是初賽，毋過我家己比學生閣較歡喜，表示我主張的「生活台語化、台語生活化」的實踐是真正對台語能力有真大的幫贊！向望佮學生以及家長繼續拍拚，繼續佇生活中講台語、用台語甚至是寫台文，累積家己的台語實力，佇後面的比賽得著好成績，來證明「生活台語化、台語生活化」的實踐理念重要性！
若是看我的文章了後, 有一寡想法，歡迎你佇下面留話予啟助，多謝。💞
參加【教育廣播電台高雄分台】專訪112.01.05(四)
非常歡喜嘛非常多謝五福國中佳琪老師的肯定推荐，佮咱前高雄女中的黃秀霞校長~無棄嫌，予我有機會來參加【教育廣播電台高雄分台】「資優夢想家You and Me」的電台訪問！
這擺校長幫我所訂的主題《從資優教育到本土語的推手》
第1階段，先分享我過去佇資優班的一寡教學的體會，資優生應該培養的能力、應該俱備的情意態度、資優生的家長佇晟養資優生會當注意的所在，佮我的教育理念分享。
第2階段，分享我按怎學台語、目前由咱的國家來推動本土語言有啥款的重要性、為啥物我欲推捒台語、現此時咱會當按怎做，thang來做伙共台語救轉來，以及分享為啥物我欲寫台語文的原因！
節目預定佇112年01月27日(週五) 09:05 ~10:00播出，等電台將播放的連結囥好了後，我才來佮所有的好朋友分享，邀請逐家做伙來聽看覓哦~
(上集 談資優教育、下集 談本土語的推動) 請點前面超連結收聽~
若是佇咱的成長過程當中，接受別人對咱的訪問，這種經驗，我想逐家可能加加減減攏有；毋過若是邀請你去廣播電台接受電台的正式專訪，我想這可能就毋是逐e5人攏有的經驗！
因為淑昭老師無棄嫌，邀請我做伙演出伊所寫的台語廣播劇《錦荔枝的滋味》，因為咱這齣台語廣播劇，佇咱這e5禮拜日9月初4透早11點半到12點，開始欲佇咱高雄廣播電台(FM94.3)開始放送，所以電台專工邀請劇本創作的作者，以及劇裡定定佮我咧答喙鼓的「媠某仔」林玉麗老師佇8/29(一)做伙來電台接受訪問，分享是按怎淑昭老師會想欲創作這篇《錦荔枝的滋味》的台文小說，又閣是按怎那會想欲閣共台文小說改編作廣播劇，這兩項到底有啥物無仝款的所在？
另外廣播劇佮台語朗讀、抑是佮台語演說有啥物無仝款的所在，阮佇這擺的專訪內面攏有分享著，而且劇裡的我(坤龍仔)佮玉麗老師(春仔)有真濟趣味的答喙鼓，阮佇電台裡面嘛有現場的演出，真歡迎逐家來聽看覓，阮這擺佇廣播電台的專訪哦~
收聽的連結 與 操作說明如下：https://www.kbs.gov.tw/index.aspx#/
 |
台語廣播劇《錦荔枝的滋味》，佇111/ 09/04 (日)透早11點半到12點首播，開始佇高雄廣播電台(FM94.3)放送，邀請逐家做伙來收聽哦~
10多謝囡仔予我的肯定
廖啟助
佇面冊頂懸當咧看朋友分享的相片，雄雄一个訊息跳出來，頂面寫講：「師父，我今仔日已經掛階矣，感謝師父過去的栽培！」
原來是我十一冬前所𤆬的資優班的徒弟仔，因為某種緣故，伊干焦讀一冬的國小資優班就離開矣。後來佇in國中的同窗會，我才知影伊去讀中正預校。透過面冊才了解，伊預校畢業了閣考著官校。
平常時仔逐家攏無閒，連繫嘛足有限，所以收著這个訊息對我來講非常的感動。我共伊祝賀，順紲對伊講不敢當。我予你的指導足有限的，是你無棄嫌我，共我遮爾看重。佇你讀軍校畢業掛階的第一時間，就傳訊息來佮我分享這个好消息，真正足感心的，伊隨共我講：「一日為師，終身為父！」
因為這个徒弟仔的分享，閣予我想起另外一个囡仔。自伊國小畢業一直到今，逐冬的教師節攏會特別傳訊息共我說多謝，祝福我教師節快樂。
頭起先的兩三冬，我想講可能是國小拄仔畢業，所以較會數念我。想袂到紲落伊讀高中、讀大學，仝款逐冬傳訊息來祝賀我。講正經的，我真感動。所以佇前幾冬，我特別共我的感受回傳予伊。
我講：「多謝你逐冬的教師節攏傳訊息祝福我，雖然內容攏無足長，毋過遮爾濟冬來，無一冬閬過，真正予師父足感動的！有時我咧想，我敢真正有佇你的身上，特別做啥物代誌抑是付出啥貨，是按怎你會一直共我這个師父囥佇你的心肝頭？雖罔你攏對我講足感謝老師過去對你的疼痛佮關心，才有今仔日的你！毋過我顛倒想欲共你講，其實是你咧鼓舞我這个做先生的人。因為有你長年來的肯定，我才會勉勵家己無論如何，一定愛做囡仔性命當中的貴人。」
我捌的代誌真少，我會當教予囡仔的閣較有限，毋過我知影，咱咧做，囡仔佮家長攏有感受著。咱愛用心牽教每一个囡仔，因為咱一句關心、鼓勵的話，真有可能就是這个囡仔佇伊這世人上重要的支持。只要用心，相信咱的教育會愈來愈光明，多謝囡仔予我的肯定。
