新 SUNNYMAN的教育天空: 2月 2026

2026年2月10日星期二

長年佇美國生長的黃仁勳,

事業成功了後, 台大佇112年的畢業典禮邀請伊轉來共畢業生演講勉勵,
一開喙就是用台灣話來佮所有現場的學生老師來賓問好,

伊原底想欲共所有的學生用台語來分享勉勵,

毋過伊煩惱伊長期無蹛台灣, 驚家己的台語無夠標準,

只好改用英文佮大家勉勵~

看著伊離開台灣遮爾久,
而且佇伊5歲就離開台灣,

毋過一直共台語記佇心肝內,

而且是一直繼續有咧講台語,

看伊對台語的要意佮疼惜, 真正予人真感動~

向望咱在地的台灣人,

會當親像伊仝款,

將台灣話囥佇心內, 佇生活中講出來~

毋知逐家聽黃仁勳講台語,
敢有感受著, 講台語足親切的,
你聽著伊按呢推銷, 講in的麵足好食的,啥人愛食麵?
in的麵足好食的, 有夠好食,有一點點仔hiam-hiam 有夠gau5煮, 有夠好食

你聽著伊按呢親切用台語推銷, 敢會想欲來食看覓?

另外我的感想, 黃仁勳佇5歳就離開台灣, 先去泰國, 9歲正式移民美國.
結果伊的台語, 比大部生活佇台灣的人, 較gau5講, 嘛更加慣勢講台語,
對咱長期生活佇台灣的人來講, 是毋是愛來加講寡台語?

向望透過黃仁勳的代言推廣，予咱台灣人會當感受著--

講台語就是遮爾仔親切，台語就是遮爾優美好聽。

希望有閣較濟人鬥陣來講台語。

頂面的影片, 我感覺是足重要的提醒,

咱互相勉勵, 予咱佮咱的厝內面人愈來愈好喔~

陰德是做無人知無人看著的好代誌

沓沓仔粒積，天公伯仔自然會共咱照顧疼惜~

1. 顏施（有好面色予厝內面人慈悲的面像彌勒佛的笑容佮肚量）

2. 眼施（慈悲溫柔的眼神看眾生, 有包容有溫暖會尊重身邊的人）

3. 言施 (溫暖鼓舞人的話、莫去講人的是非(保護當事人) vs.口業）

4. 身施（用行動共人鬥相共、共有危險的物件清掉、替人設想減輕別人的負擔、主動做別人的貴人）

5. 心施（存好心、欣賞肯定祝福別人、袂去怨妒、將心比心設想）

6. 座施/讓施（讓人/退一步，食虧是一種福氣)

足重要的提醒利用食飯的時間聽完, 相信對咱會有足大的幫助~

2026年2月10日 星期二