啟助佇【高雄廣播電台】/ 【佮臺語行做伙】的節目開始播送矣

113.04.24 更新

因為新節目會把舊的節目給蓋過去, 所以啟助的電台訪談內容，

請點底下內容收聽, 謝謝。

https://drive.google.com/file/d/1IctE1jcNGfJ3RmWnpzTtGuzIIN7T1Mi3/view?usp=sharing

【阿母的故事】 107年全國語文競賽閩南語朗讀文章(教師組)

❤分享阿母細漢讀冊的故事, 勉勵所有的囡仔愛珍惜會當讀冊的機會~

08阿母的故事

廖啟助

阿母有六个兄弟姊妹，伊是上大漢的，紲落去是阿姨。因為佇五六十冬前，作穡人的環境攏無好，序大人愛出去趁錢，厝裡的囡仔，攏是叫大漢的鬥顧較濟，所以阿母佮阿姨兩个人自細漢就愛照顧四个小弟。較早的年代，國校仔一禮拜愛讀六工。因為厝裡的小弟需要人顧，阿母佮阿姨兩个人就輪流去讀冊，一个讀一三五，一个讀二四六。

因為厝裡的環境無好，若有閒的時，伊就會做瓜笠仔、畚箕，加減趁寡所費通買簿仔紙、鉛筆佮拊仔。彼个時陣的簿仔紙誠貴，阿母練寫字的時，攏會雙面寫。等兩面攏寫滇的時，才閣提拊仔共寫過的字全部拊予清氣，通會當閣寫。買鉛筆嘛是一項開銷，除了家己做工課趁錢去買以外，伊會去抾好額的同學欲擲㧒捔的鉛筆來寫。這款鉛筆常在攏是無蓋好扲，毋過若是欲寫猶閣會使寫誠久，伊就會共鉛筆尾仔小削一下，提一枝原子筆管共鬥起去，按呢原底短短的鉛筆就又閣變長，變好提好寫矣！

阿母讀國校的時代，一班有五六十人。伊雖然讀一工閬一工，毋過上課攏足專心。若是拄著隔工無去上課，伊就佇放學彼跤兜，𤆬阿舅in做伙去路仔等同學，請教同學看今仔日老師教啥物、派啥物功課，轉來厝就會緊利用時間寫功課。有袂曉的所在就做記號，隔工提去問老師，阿母就是按呢保持好的成績。

佇較早欲讀初中是愛通過考試才會當讀。老師看阿母的功課攏保持佇頭前，煞讀一工閬一工，就去厝裡做家庭訪問。後來才知影阿母的苦衷，老師主動欲推薦伊保送去讀初中，只不過外媽in兜家境實在無好，姑不而將只好放棄這个好機會。

阿母自細漢就共阮講伊的故事，叫阮愛珍惜會當讀冊的機會。因為有阿母的鼓勵佮牽教，我才有今仔日。我嘛常在講阿母的故事予我的學生聽，in聽了嘛加足捌代誌，會較認真讀冊，所以才想欲分享阿母的故事予閣較濟的學生聽，勉勵in會當知福惜福，認真拍拼讀冊，做一个有路用的人！ 107年全國語文競賽閩南語朗讀(教師組).pdf

【啟助甲辰龍年的祝福】

 【啟助甲辰龍年的祝福】

啟助祝福所有的老師、長輩、好朋友

佮恁的厝內面人

甲辰龍年大吉利
事事項項龍順序

工作如意龍趁錢
頂司人客龍佮意

翁某仝心笑微微
囡仔乖巧好育飼
貼心有孝又伶俐
考試成績足滿意
金榜題名真歡喜
用心學習成大器
待人處事蓋客氣
做人成功閣謙虛
眾人呵咾牽成伊
熱心付出捷布施
喙笑目笑過日子
平安健康迎龍年
無煩無惱食百二
心想事成龍如意

113.02.12 (正月初三)

ps.頂面的圖片是蒐集自朋友所分享予我的祝福,純粹共遮的美好的祝福佮眾人分享,版權是原作者所有, 若有侵權的所在,敬請諒解通知,會馬上移除, 感恩~

新正年頭講好話句