❤分享阿母細漢讀冊的故事, 勉勵所有的囡仔愛珍惜會當讀冊的機會~
08阿母的故事
廖啟助
阿母有七个兄弟姊妹，伊是上大漢的，紲落去是阿姨。因為佇五六十冬前，作穡人的環境攏無好，序大人愛出去趁錢，厝裡的囡仔，攏是叫大漢的鬥顧較濟，所以阿母佮阿姨兩个人自細漢就愛照顧四个小弟。較早的年代，國校仔一禮拜愛讀六工。因為厝裡的小弟需要人顧，阿母佮阿姨兩个人就輪流去讀冊，一个讀一三五，一个讀二四六。
因為厝裡的環境無好，若有閒的時，伊就會做瓜笠仔、畚箕，加減趁寡所費通買簿仔紙、鉛筆佮拊仔。彼个時陣的簿仔紙誠貴，阿母練寫字的時，攏會雙面寫。等兩面攏寫滇的時，才閣提拊仔共寫過的字全部拊予清氣，通會當閣寫。買鉛筆嘛是一項開銷，除了家己做工課趁錢去買以外，伊會去抾好額的同學欲擲㧒捔的鉛筆來寫。這款鉛筆常在攏是無蓋好扲，毋過若是欲寫猶閣會使寫誠久，伊就會共鉛筆尾仔小削一下，提一枝原子筆管共鬥起去，按呢原底短短的鉛筆就又閣變長，變好提好寫矣！
阿母讀國校的時代，一班有五六十人。伊雖然讀一工閬一工，毋過上課攏足專心。若是拄著隔工無去上課，伊就佇放學彼跤兜，𤆬阿舅in做伙去路仔等同學，請教同學看今仔日老師教啥物、派啥物功課，轉來厝就會緊利用時間寫功課。有袂曉的所在就做記號，隔工提去問老師，阿母就是按呢保持好的成績。
佇較早欲讀初中是愛通過考試才會當讀。老師看阿母的功課攏保持佇頭前，煞讀一工閬一工，就去厝裡做家庭訪問。後來才知影阿母的苦衷，老師主動欲推薦伊保送去讀初中，只不過外媽in兜家境實在無好，姑不而將只好放棄這个好機會。
阿母自細漢就共阮講伊的故事，叫阮愛珍惜會當讀冊的機會。因為有阿母的鼓勵佮牽教，我才有今仔日。我嘛常在講阿母的故事予我的學生聽，in聽了嘛加足捌代誌，會較認真讀冊，所以才想欲分享阿母的故事予閣較濟的學生聽，勉勵in會當知福惜福，認真拍拼讀冊，做一个有路用的人！
107年全國語文競賽閩南語朗讀(教師組).pdf
讀了這篇文章,予人對恁阿母誠疼痛,彼時逐家的環境普遍無好,龍崎鄉閣因為自然環境的關係,歹趁食,足濟散凶人失去讀冊的機會,實在真無彩。啟助兄今仔日的成就,阿母應該是感覺真安慰,而且伊的故事嘛會當勉勵學生囡仔愛好好仔寶惜讀冊的機會。
回覆刪除真感謝非雄兄的留話分享你的想法！ 第一擺看著有人遮爾用心讀我所寫的文章閣專工留話予我， 真正足使人感動的！而且閣有人認捌我佮阿母的故鄉~龍崎，真正足無簡單，因為足罕得有人知影龍崎這个的所在。佇龍崎這个庄跤所在，確實真歹趁食，所以我的外公外媽嘛因為環境無好過，才無法度好好栽培我的阿母。確實佇我的成長過程中，阿母伊攏會一直鼓舞阮三个兄弟姐妹，愛好好仔珍惜有冊通讀的機會，毋通像伊按呢，想欲讀冊可惜無冊通讀，所以我確實是愛真感謝阿母過去對我的鼓舞栽培，嘛因為按呢，我才會想欲共阿母的故事寫出來予閣較濟學生囡仔看，向望有機會讀著這篇文章的人，會當仝款受著鼓舞，做伙來寶惜讀冊的機會~
回覆刪除龍崎區佇臺南倚山區,無捷運和高鐵,公車嘛無幾幫,所在不止仔揜貼,這種環境孕育出來的人攏真儼硬,也真韌命,恁阿母實在真無簡單,佇遮爾䆀的條件之下共恁三个囡仔晟養大漢,伊規个人生的故事誠實是上好的教材。
刪除多謝非雄兄對阮阿母的肯定, 龍崎真正是足偏僻閣散赤的山區, 阿母確實是一位足堅強的女性, 伊的人生故事有足濟是值得我學習的所在, 每一擺我若是遇著困難的時, 想著我的阿母, 我攏會想講, 我這馬的困難佮阿母所遇著的困難比起來, 真正是零星的，所以我就會繼續向前行，想辦法解決難關~
刪除阿母的人生故事,佮伊的言教、身教,成做你振作、勇敢向前行的動力。後日仔咱若拄著任何困難，攏無藉口變貧惰骨,愛拚才會贏,逐家互相勉勵！
回覆刪除是啦, 阿母就已經拚甲按呢矣, 咱若會當閣揣藉口, 當然愛勇敢向前行, 愛拚才會贏,咱互相勉勵！
刪除