散文 | 廖啟助 | 聽〈阿母的話〉這首歌ê感動 (台文通訊 第375期 )

因為真佮意農村武裝青年，所以專工tshuā阿爸阿母來高雄駁二特區聽in的現場演唱會

           佮主唱兼吉他手阿達仔做伙翕相

           ps. 下面文章的字若是黃色的字就是有超連結，有台語辭典的解說，歡迎點入去看喔~

聽〈阿母的話〉這首歌的感動

 

作者：廖啟助

 

        自查某囝出世，我就想欲共「阿公阿媽講的話」好好仔傳予囡仔。有一擺，我無意中去聽著「農村武裝青年」佇成功大學「跤踏土地唱民謠」演唱會內面演唱的〈阿母的話〉這首歌，若親像是透過主唱兼吉他手阿達仔的喙來講出我的心聲。我這个做老爸的人，那聽阿達仔的分享目屎那流。你講敢有遮譀？無毋著，就是予我遮爾感動，請你沓沓仔聽我說明，是按怎我會遮爾仔感動。

 

        我是佇台南龍崎大漢的庄跤囡仔，自細漢毋但厝內面人攏講台語，會使講是規个庄頭，甚至是規个鄉鎮的人攏是全台語咧佮人溝通接接，所以我就佇遮爾純的台語母語環境大漢。毋過，後來退伍了後到高雄教冊食頭路的時，身邊講台語的人無濟，有咧講的人，嘛是攏透濫華語咧講較濟，我無意中嘛開始綴in講華語。

       

        歇睏的時轉來台南厝裡佮阿爸阿母抑是阿公阿媽開講的時，煞變做足濟台語語詞開始袂記得愛按怎講。講台語的時，喙舌攏會拍結、袂輾轉，愛停落來問序大人這个語詞按怎講，才有法度閣用台語講落去。所以差不多20冬前，我開始有意識提醒家己盡量用台語佮人接接溝通，來保持家己的台語能力。

 

      因為蹛庄跤，序大人無特別注重我的課業，細漢的時攏咧𨑨迌，啊無，就是去田裡鬥相共較濟。加上厝內環境無好，無啥物教育資源，就算阮班干焦7个人，我的成績猶是按尾仔算來前3名較濟，我佇學校考試的成績一直攏無好！自國小差不多三四年以後，才意識著成績bái這項代誌，一直到讀大學的時，我對家己的表現，攏有真深的自卑！

 

佇民國99年彼冬的「國語文」競賽，我聽著教學組長講，目前「國語」的比賽項目，同事攏報滇矣，毋過台語演講這項無人報，敢有人欲來報名？啥物！我敢有聽毋著？全國的語文競賽，竟然有台語的比賽項目，閣拄仔好演講這項無人參加，我就青盲毋驚銃，殘殘主動去報名，代表學校比賽。

想袂到我頭擺去比賽，就予我得著全高雄市教師組的第一名，這對一个自細漢佇庄跤大漢、自卑的我來講，是有夠大的肯定佮鼓舞，講台語的庄跤囡仔嘛有出頭天的一工！自彼時開始，我叫家己愛疼惜台語，共咱的母語傳承落去，就按呢，我費心、用心教家己的囡仔講台語。

 

         我足希望阮查某囝會曉講in阿公阿媽佮我講的話，所以自伊出世開始學講話，我就攏全台語咧佮查某囝講話；毋過阮太太的母語毋是台語，所以伊佮查某囝講華語。因為身邊大部分的人對阮查某囝講華語，干焦我這个老爸講台語，伊tsua̋nn變做無啥 愛講台語。為著欲繼續傳承台語，只要伊講一句華語，我就佇邊仔隨講一句台語，予伊知影這句華語若換做台語欲按怎講。

        有一擺我為著欲教囡仔講台語，要求查某囝愛講台語，伊煞共我應講：「阮同學啊無人咧講台語，是按怎阿爸你就愛遐堅持叫阮講台語？」聽著伊按呢共我應，我的心內佮阿達仔仝款，煩惱阮查某囝是毋是認為「講母語是一項真見笑的代誌」，感覺「是按怎咱兜講的話會佮人無仝？」

 

 太太看阮舞甲爸仔囝起衝突，無愛看阮拍歹感情，伊開喙講：「是按怎你愛遐堅持叫囡仔講台語？我嘛無咧講台語，毋是仝款過了好好？你為著欲教囡仔講台語，舞甲爸仔囝相罵，按呢敢有必要？敢有價值？」後來我只好讓步，無閣堅持叫囡仔一定愛開喙講台語，干焦用好喙、用參詳、用姑情的方式，叫in盡量會加講寡台語，我仝款家己一个人堅持講台語予in聽。

 

長期落來兩个囡仔猶是真罕得佇我的面頭前講台語，坦白講，對我這个逐工想欲共母語傳予in的老爸來講，心內一直攏是傷痕，痛甲無人知，身邊的人攏無法度體會佮了解，甚至予我感覺心肝若像有一部分已經強欲焦去矣！為著欲予囡仔有法度來做伙講台語，我嘛捌去請教幾个教授抑是其他資深的台語老師，問in有啥物撇步通來改善這个狀況。

In予我的答案佮建議攏差不多是：叫我寬寬仔來、莫急嘛莫勉強囡仔一定愛按怎，因為「硬挽的果子袂甜」，相信時間一下久，囡仔的表現自然會改善。看著遮濟教授佮老師攏按呢共我鼓舞佮建議，我嘛只好放下，叫家己順其自然，慢慢等待花開的彼工。

 

我繼續堅持逐工佇囡仔身邊佮in全台語講話，嘛做模範予我的囡仔看，一直充實家己，讀台文提專業級的認證、去參加演講比賽、寫文章投稿、參加教育部辭典編輯培訓、本土語言意識培力培訓、做宣講師、四界去演講、到真濟縣市做評審、做伙去演台語廣播劇、參加台語有聲冊錄音，尾仔甚至改途做台語老師。我一直關心、鼓舞身邊的人鬥陣講台語，會使講規个心攏佇傳承母語頂面。

 

囡仔看我做這爾濟台語工課，應該知影我向望共母語傳落去。大漢查某囝捌代表學校參加台語演講比賽，甚至佇國中的時捌提著市賽第三名。伊去參加教育部B卷的台語認證考試，完全無準備，一擺就通過B1中級，甚至差10外分就到B2的程度。細漢查某囝嘛有代表學校去比台語朗讀，學校的台語老師嘛共我呵咾講伊是in班台語課表現上好的學生。看著兩个囡仔的表現，我知影我這个阿爸平常時逐工對in講的話，in攏有囥佇心肝內佮頭殼底。

 

這馬聽著〈阿母的話〉這首歌，予我想起大漢查某囝有一工佇line寫予我訊息，伊講：

恭喜阿爸你的台文寫作投稿又閣錄取矣😚！

我感覺厝內面人會當做伙分享歡喜的代誌是足讚的~ 

純文字沒啥溫度，毋過我發自內心替阿爸歡喜喔~

雖然我平常時仔攏無咧講台語，

毋過我支持你對台語的貢獻和參與。

加油~衝衝衝❤️‍🔥❗

你定定鼓勵我，所以我嘛欲替你加油！

想起查某囝這ê共阿爸鼓舞的話，予阿爸知影，你袂感覺阿爸對你講母語是見笑代，嘛袂感覺講阿爸一直咧講台語會予你感覺真歹勢。你閣支持阿爸去參與對台語有貢獻的種種活動，阿爸有沓沓仔去感受著，原來我過去佇恁的心內tiàm的台語種子，嘛已經慢慢咧發穎開花矣！

 

若是看我的文章了後, 有一寡想法，歡迎你佇下面留話予啟助，多謝。💞

線頂完整的雜誌內文， 請點台文通訊BONG報 375期，2025年6月出刊 的超連結來欣賞喔~