會替人想的囡仔，予人印象上深

會替人想的囡仔，予人印象上深

    足巧、足gau5讀冊的囡仔，敢會予你一直囥佇心肝頭？生做足媠抑是足緣投的囡仔，敢會予你一直記佇心肝內？若準講攏毋是的話，啥物款的囡仔會予你一直記牢牢？

    前幾工我去一間水餃店，拄仔食飽出來欲騎車離開，邊仔拄仔好有一个看起來差不多是國小5-6年，抑是國一的查某囡仔，伊嘛拄仔水餃買好，欲騎伊的跤踏車離開。

    伊看著我欲牽車走，伊刁工行去伊跤踏車的菜藍仔的所在，兩支手對手扞仔挽咧，將伊家己的跤踏車撨倚伊個人彼邊，予我這邊欲牽車出來的時會當較闊較好出入，等我共車牽出來了後，伊才行去伊的跤踏車的椅苴仔邊，沓沓仔將伊家己的跤踏車牽出來！

    一般的狀況攏是，隨人牽隨人的車騎走，毋過彼工這个查某囡仔的表現，真正予我印象足深的！ 我心肝頭咧想，是啥物款的序大人，哪會有法度教出仔遮爾會曉替人想的囡仔！

    另外一工，因為天氣足熱，我拄仔想欲載2亇查某囝去7-11食點心兼吹冷氣讀冊，揣足濟間攏客滿無位，尾仔總算揣著一間，對外口的玻璃窗看入去，總共有5个位，干焦2亇查某國中生坐佇內面中央的2位，一爿有一位，另外一爿有2位。我想講：哇！ 好佳哉，猶有3个位，稍等入去， 會當叫我2亇查某囝坐做伙，我佮in分開坐無要緊！

    想袂到，我車猶袂停好，我2亇查某囝已經走入去7內面，這2亇查某國中生看著我的查某囝行倚in，in2亇人因為對玻璃的彼邊，遠遠就看著我載2亇囡仔，所以我的2亇查某囝行倚in的時，in竟然主動攏爬起來徒位，2亇人家己坐去上邊仔倚壁邊仔的所在，將賰的3位讓予阮3亇爸仔囝，予阮3亇人會當坐連做伙！

    看著這2亇的國中生這爾捌代誌，這爾會曉替人想，我趕緊叫2亇查某囝愛緊共這2亇姐姐說多謝！而且利用這擺的機會開破予in了解，啥物叫做會曉替人想的道理！嘛共頭前牽跤踏車讓爸爸先騎走的另外1亇姐姐的代誌做伙講予in學習，予in會當去了解，啥物叫做捌代誌、會曉替人想。  

    以上這2亇生活經驗當中，會曉主動替人設想的囡仔，就是予我印象足深，予我會一直囥佇心內，甚至親像這馬，願意開時間將這个過程故事寫出來佮逐家分享的囡仔，就是予我會一直記牢牢的囡仔~