多謝囡仔予我的肯定 錄取 109年全國語文競賽 教師組閩南語朗讀文章

(點我聽錄音檔)

10多謝囡仔予我的肯定

廖啟助

佇面冊頂懸當咧看朋友分享的相片，雄雄一个訊息跳出來，頂面寫講：「師父，我今仔日已經掛階矣，感謝師父過去的栽培！」

原來是我十一冬前所𤆬的資優班的徒弟仔，因為某種緣故，伊干焦讀一冬的國小資優班就離開矣。後來佇in國中的同窗會，我才知影伊去讀中正預校。透過面冊才了解，伊預校畢業了閣考著官校。

平常時仔逐家攏無閒，連繫嘛足有限，所以收著這个訊息對我來講非常的感動。我共伊祝賀，順紲對伊講不敢當。我予你的指導足有限的，是你無棄嫌我，共我遮爾看重。佇你讀軍校畢業掛階的第一時間，就傳訊息來佮我分享這个好消息，真正足感心的，伊隨共我講：「一日為師，終身為父！」

因為這个徒弟仔的分享，閣予我想起另外一个囡仔。自伊國小畢業一直到今，逐冬的教師節攏會特別傳訊息共我說多謝，祝福我教師節快樂。

頭起先的兩三冬，我想講可能是國小拄仔畢業，所以較會數念我。想袂到紲落伊讀高中、讀大學，仝款逐冬傳訊息來祝賀我。講正經的，我真感動。所以佇前幾冬，我特別共我的感受回傳予伊。

我講：「多謝你逐冬的教師節攏傳訊息祝福我，雖然內容攏無足長，毋過遮爾濟冬來，無一冬閬過，真正予師父足感動的！有時我咧想，我敢真正有佇你的身上，特別做啥物代誌抑是付出啥貨，是按怎你會一直共我這个師父囥佇你的心肝頭？雖罔你攏對我講足感謝老師過去對你的疼痛佮關心，才有今仔日的你！毋過我顛倒想欲共你講，其實是你咧鼓舞我這个做先生的人。因為有你長年來的肯定，我才會勉勵家己無論如何，一定愛做囡仔性命當中的貴人。」

我捌的代誌真少，我會當教予囡仔的閣較有限，毋過我知影，咱咧做，囡仔佮家長攏有感受著。咱愛用心牽教每一个囡仔，因為咱一句關心、鼓勵的話，真有可能就是這个囡仔佇伊這世人上重要的支持。只要用心，相信咱的教育會愈來愈光明，多謝囡仔予我的肯定。

【多謝囡仔予我的肯定】~ 運氣足好 錄取 109年全國語文競賽-閩南語朗讀文章(教師組)

多謝我的好徒弟仔~ 鍾凱名、 雷鎧擇 （Kai-Ze Lei）對我的肯定，我才有機會將這篇故事完成，受著評審委員的鼓勵，佮逐家做伙分享我共學生囡仔的感情~ 更加感謝濟濟的家長好朋友，佇囡仔畢業了，仝款共我關心鼓勵，無共我放袂記，過年過節總是會想得我，甚至閣繼續來相揣坐，有好空的就會想著我，真正予我足感動的~再次感謝恁，予我遮濟肯定，會當教著恁的囡仔，會當佮恁做朋友，會當做老師的我，真正是有夠幸福的~ 嘛利用今仔日109.09.28(一)的時間，再次感謝過去所有用心指導過我的老師(李銘傳老師、黃良成老師、謝嘉勝老師、莊茂松老師、吳福見老師、陳慶山校長、李芃娟老師、吳昆壽老師、余國華老師、王亦榮老師、蔡典謨老師、許素燕老師、洪春生老師、陳玉蟬老師、陳麗旭老師、陳永富老師、楊宜倫老師,...), 因為有恁的用心指導佮牽教，我才有機會來考著老師，才有法度學會曉按怎去做一位好的老師。

另外愛特別感謝蔡宗禮老師的指導，予我會當開始行上學習台語文這條路；感恩洪淑昭老師的牽教，引tshuā我行入寫作的台語路，有你的指導，我今仔日才有法度自由自在寫出我的心、我的情、我的記持、我的生活、我的美麗世界，用台語文佮所有的好朋友結緣交陪~