成功國小 談交通安全教育的重要性

 成功國小 談交通安全教育的重要性

 

真濟人感覺，交通安全哪佗閣教，毋是紅燈停，青燈行就好矣！我自細漢到大漢，攏嘛是按呢咧行就無代誌，嘛有順利提著駕照，盍有需要閣上啥物交通安全課程。所以真濟人，包括做老師的人，可能攏會去疏忽交通安全教育的重要性！

        這幾冬來，我因為擔任生教組長，有機會去參加教育局裡所舉辦的交通安全研習，嘛去參加交通部「路老師」的交通安全教育講師培訓，閣加上厝內面人捌發生過車禍，所以予我深深感受著交通安全教育的重要性！過去家己辦校內交通安全教育研習邀請來的講師，有時攏無法度講到我心內想欲予老師了解的部分，抑是去打動來聽課的老師in對交通安全教育的重視。所以今年度，我家己校內的教師進修研習，就決定由我家己來做講師，主題就是《談交通安全教育的重要性》，自開始構思訂演講的方向，收集相關講課的資料佮影片，製作簡報，調整修改，練習講解閣再調整，前前後後可能開超過5-60點鐘以上的時間做準備。佇學校分享演講了後，同事反應攏袂䆀。

         紲落來，我想講已經攢遮呢久矣，逐家反應也猶會使tsit，規氣就佇全高雄市的學務群組自我推薦，希望有其他的學校老師有機會會當聽著我的分享。真歡喜成功國小的組長佮我聯絡，予我有機會去in學校做分享。

 

到研習結束的時，來聽課的老師佮我分享：原來交通安全教育有遮濟鋩鋩角角愛注意代誌，有遮濟所在愛提醒咱的囡仔，原來交通安全的研習，佮in原底所想的有遮大的無仝款，原來交通安全教育真正足重要！

         看著老師按呢的回饋，嘛感覺家己今仔日的分享真有成就~

 ====================================================================
 當工， 95 %以上攏是用台語來演講，推捒交通安全教育兼台語，一兼二顧，講甲真歡喜~

●註解：

1.濟tsē/tsuē：多。

2.哪ná : 疑問詞。怎麼會。

3.佗toh : 何處、哪裡。。

4.閣koh: 又、再、還。

5.盍khah: 豈。難道、怎麼，表示疑問的語氣。

6.捌bat/ pat : 曾經。

7.家己ka-kī / ka-tī : 自己、本身。

8.抑ia̍h / iah / a̍h / ah : 或、還是。表示選擇關係。

9.in：他們。第三人稱複數。

10欲 beh / bueh : 要、想，表示意願。

11袂䆀 bē-bái/buē-bái : 不錯。

12紲suà: 接、續。

13攢tshuân: 張羅、準備。

14規氣kui-khì : 乾脆。做事直接乾脆，不拖泥帶水。

15鋩角mê-kak : 比喻事物細小而且緊要的部分。

16按呢án-ne/án-ni這樣、如此。