戇囡仔 /劉毅

《戇囡仔》Gōng Gín-á

詞曲：劉毅.

sî-khik : Lâu-gē

------------------------------------------

細漢的時陣

sè-hàn ê sî-tsūn

阮阿母上𠢕煮菜

gún a-bú siōng gâu tsú-tshài

每一擺攏煮甲

muí tsi̍t-pái lóng tsú kah

煮甲芳貢貢

tsú kah phang kòng-kòng

有時是咖哩飯

ū-sî sī ka-lí-pn̄g

有時是炒米粉

ū-sî sī tshá-bí-hún

有時是我上愛食的肉燥飯

ū-sî sī guá siōng ài tsia̍h ê bah-sò-pn̄g

每一擺食飯的時

muí tsi̍t-pái tsia̍h-pn̄g ê sî

阿母總叫阮緊緊食

a-bú tsóng kiò gún kín-kín tsia̍h

毋過伊總是無佮阮鬥陣

m̄-koh i tsóng-sī bô kah gún tàu-tīn

抑是洗大鼎

ia̍h-sī sé tuā-tiánn

抑是款廚房

ia̍h-sī khuán tû-pâng

最後食到賰菜尾

tsuè-āu tsia̍h kàu tshun tshài-bué

伊才窮來食

i tsiah khîng lâi tsia̍h

有一工

ū-tsi̍t-kang

阿母問我

a-bú mn̄g guá

你敢知阮愛食啥物

lí kám tsai gún ài tsia̍h sí-mih

我想起每一擺

guá siūnn-khí muí tsi̍t-pái

阿母攏窮菜尾

a-bú lóng khîng tshài-bué

就共阿母講

tiō kā a-bú kóng

阿母上愛食菜尾

a-bú siōng ài tsia̍h tshài-bué

阿母仔微微仔笑

a-bú--á bî-bî-á tshiò

微微仔笑

bî-bî-á tshiò

叫我

kiò guá

你乎

lí--honnh

戇囡仔

gōng gín-á

---

大漢了後才知影

tuā-hàn liáu-āu tsiah tsai-iánn

彼是阿母的疼

he sī a-bú ê thiànn

毋管食好食䆀

m̄-kuán tsia̍h hó tsia̍h bái

總先予咱食飽

tsóng sing hōo lán tsia̍h-pá

彼是阿母的疼

he sī a-bú ê thiànn

彼是阿母的疼

he sī a-bú ê thiànn

阿母的疼

a-bú ê thiànn

阿母仔微微仔笑

a-bú--á bî-bî-á tshiò

微微仔笑

bî-bî-á tshiò

叫我戇囡仔

kiò guá gōng gín-á

阿母仔微微仔笑

a-bú--á bî-bî-á tshiò

微微仔笑

bî-bî-á tshiò

叫我

kiò guá

你乎

lí--honnh

戇囡仔

gōng gín-á

有一擺

ū tsi̍t-pái

我對阿母講

guá tuì a-bú kóng

阿母

a-bú

失禮

sit-lé

我彼工按呢講

guá hit-kang án-ní kóng

阿母微微仔笑

a-bú bî-bî-á tshiò

戇囡仔

gōng gín-á =================================

歌詞來源 : https://www.facebook.com/groups/922800454445724/posts/8838298749562482/

散文 | 廖啟助 | 以文會友~歡喜熟似芳宴老師

【以文會友~歡喜熟似芳宴老師】 

佮芳宴老師熟似的時間無蓋長，知影伊是一位足優秀的音樂老師，對台語的推捒真用心，毋管是本身的台語朗讀抑是台語演講攏得著全國賽的肯定，指導的學生囡仔仝款嘛是全國賽的狀元學生，會使講是老師佮學生攏足本事的！ 

毋過予我更加佩服的是，伊是一个足用心的媽媽，共2个囡仔攏教了足好，除了課業免人煩惱，嘛攏有綴媽媽共阿母的話傳落來，閣真貼心。親像伊的查某囝佇高雄食頭路，知影媽媽思念伊，就專工佇高雄訂飯店，邀請佇台北的阿娘、佇台中的小弟，坐高鐵做伙落來高雄團圓開講，順紲去中央公園散步，感受咱高雄的媠，提早慶祝聖誕節，便若想著有遮呢捌代誌的貼心查某囝，以及規家伙仔仝心的甜密親情，就感覺足溫暖的。 

所以知影芳宴老師有落來高雄，我趁載囡仔去補習的閬縫，佮伊約佇飯店鬥陣開講，互相交流、互相勉勵、互相祝福，祝福新的一年：咱佮厝內面人身體勇健平安，教學抑是上班攏順序，台語傳承愈順利，事事圓滿皆如意~💕

一的炒米芳（台灣傳統唸謠）

情境式演說比賽技巧 #看圖講故事

講台語，予咱較親近！用台語陪長輩過年，親近彼此的生活🧡

看懂羅馬字 羅馬字的結構 2017.07.13—林佳怡

感謝導師鬥tshuā學生讀台語

       感謝有普通班導師的鬥相伨，願意撥出時間做伙來鬥tshuā學生讀台語 ，小小ê一杯咖啡，代表我對你鬥推捒台語ê感謝。💞嘛感謝你予我有靈感寫作，昨昏投的稿, 運氣真好，錄取矣^^　

【廣告START】完整版EP11｜十年才得一個武狀元，世界獅王呂美吉的武術之路

囡仔你敢知-「跤踏土地唱民謠」演唱會-7 #農村武裝青年

散文 | 廖啟助 | 為啥物我欲推捒母語 咱會當按呢做！(台文通訊 第347期 )

    台語是我ê母語，我感覺台語非常ê媠，可惜佇我服務ê國小有2300外ê學生囡仔，抑是我ê查某囝讀ê國中，差不多有2600外人，下課差不多攏無人咧用台語開講！佇兩間這爾大間的國中國小【學校】內面，攏總差不多有將近5000ê囡仔，結果in差不多攏無咧講母語，當然我想佇其他的學校的嚴重性應該嘛精差無濟！佇我蹛ê【社區】尤其是公園內，身軀邊仔嘛足少聽著人講台語，尤其是40歲以下ê人，會當講是無té聽！阿公阿媽佮40外歲以下ê爸母差不多攏用華語佮囡仔佮孫仔講話，種種ê狀況，予我意識著台語真正欲滅亡矣！所以咱一定愛緊共這ê台語欲無去矣ê危機講予逐家知！

 

欲按怎共母語救轉來，咱會當按呢做：

1.   愛有母語欲消失去ê危機意識！

過去是政策對母語ê打壓，這馬是逐家無意識著母語欲消失去ê意識，無體會感受著母語消失ê速度佮嚴重性，所以咱一定愛盡量予咱身軀邊ê人，會當去意識著母語欲消失去ê危機，而且愛予愈濟人知影愈好，按呢才有法度鬥陣來挽回。

 

2.   愛知影語言ê消失就是這ê文化ê消失

語言是文化ê載體，嘛是文化ê一部分，語言一旦消失，這ê文化就會綴咧消失，所以咱愛有傳承母語佮文化ê使命感，予咱ê後輩會當久久長長，去聽著/看著咱ê母語佮文化一代傳一代流傳落去！

 

3.【佇學校】營造講母語ê友善環境

(1)對校長/主任/所有ê老師做伙有意識使用母語

囡仔佇學校ê時間上長，加上同學之間ê影響力是上大，所以教育部佮教育局愛把握這段黃金時期，佇上課課程以外，加強營造母語友善環境來做起！愛呼籲咱ê學校，對校長/主任/所有ê老師做伙來做起，予老師會當有意識ê使用母語，平常時仔加用台語來溝通，予學生囡仔會當看著原來我ê老師in是遮爾愛用母語來開講交流！

 

(2)將母語佮生活結合，所有科目，攏盡量加減用母語來教課

母語是生活中ê母語，毋是干焦上母語課ê母語，所以邀請所有教課ê老師，每一科目攏會當加用寡母語來講課紹介，予囡仔會當佇生活中看著感受著，原來母語是會當使用佇其他科目學習頂面，而且傳承母語，是所有老師ê工課，毋是干焦教母語課ê老師ê代誌！

 

(3)請導師主動佮班上ê囡仔講母語

導師佮囡仔鬥陣ê時間上長，對囡仔ê影響力甚至比爸母閣較大，所以營造一ê友善ê母語環境，真重要ê一部分是請導師主動佮囡仔講母語，尤其是下課時間，按呢囡仔in就會感覺我ê老師/我ê校長/主任攏咧講母語，原來講母語是真正四常ê代誌，免歹勢嘛袂奇怪，按呢ê效果會上好！

 

(4)將講母語列入班上獎勵制度

    重賞之下必有勇夫！大部分ê囡仔攏足有榮譽感，所以佇導師ê班上獎勵制度頂面，若是會當將講母語囥入去班上每一工ê獎勵制度內面，按呢ê推捒效果會閣較好，因為囡仔攏會想欲爭取加分，透過獎勵，囡仔會愈骨力愈勤快去使用母語！

 

(5)予囡仔看會著/聽會著/感受會著，講母語是足四常ê代誌

    任何語言ê學習攏是透過「聽、講、讀、寫」這四ê順序。所以咱ê囡仔，佇生活中若是會當聽著有夠濟ê母語，in自然就會曉開喙講母語，予in袂感覺講母語是足奇怪抑是ngāi-gio̍h ê的代誌，甚至咱若會當營造出來講母語是時行又閣奅ê代誌時，囡仔佮同伴之間就會互相影響，互相相thuā，按呢ê效果會比老師佇台仔頂咧教閣較緊，這就是【佇學校】營造講母語ê友善環境ê重要性！

 

4.【佇厝裡】爸母有意識先講母語~做囡仔ê模範

(1)爸母先做模範，講予囡仔看/講予囡仔聽/講予囡仔學

    除了學校老師ê牽教，爸母ê支持佮示範，對囡仔學母語嘛是非常ê重要，所以咱作序大人ê人，愛先做模範，講予囡仔看/講予囡仔聽/講予囡仔學，囡仔自然就會來接受兼接收咱ê母語。

 

(2) 捷講喙會順~免有壓力/免驚袂輾轉/免歹勢

學任何語言攏仝款，捷講喙會順，捷寫手袂鈍，所以咱講母語嘛是仝款，ta̋nn開始ê時，一定會拄著袂曉講，抑是講袂輾轉ê時陣，咱毋免有壓力，會曉guā濟講guā濟，免驚人笑，中文透濫嘛無要緊，攏免歹勢，相信只要「聽佮講ê量有夠濟」，自然就會進步~

 

(3)阿公阿媽愛看重家己ê母語，主動佮囡仔佮孫仔講母語

    阿公佮阿媽ê母語是厝內面講了上正pān上純正ê人，所以咱做阿公阿媽ê人愛看重家己ê母語，愛主動佮序細抑是孫仔講母語，按呢厝內面人才有法度去聽著學著端的又閣媠氣ê母語，咱ê母語欲久長傳承落去ê機會就會愈懸，所以一定愛請咱ê阿公阿媽看重家己ê母語，主動佮囡仔佮孫仔講母語，予母語通繼續傳承落去。

 

(4)向人請教兼主動查辭典

    學語言ê過程中，一定會去tng著袂曉抑是無確定ê代誌，這咧時陣咱就愛發揮活到老，學到老ê精神，主動去請教身軀邊ê tshia̋n-pái抑是長輩，抑無就愛主動去查辭典，按呢咱就會當學著愈來愈濟、愈來愈深、愈來愈闊ê母語！

 

5.【請政府】拍廣告 / 影片放送予全民知

(1)呼籲大眾母語得欲消失去ê危機

    現此時母語無法復振，上大ê原因就是大家無母語意識，尤其是毋知影母語消失ê速度佮嚴重性，以及母語消失對咱ê文化抑是對咱ê台灣ê損失，這是佇過去咱ê社會，尤其是升學制度抑是工商社會當中，逐家長期以來攏無去注重佮意識ê所在。所以現此時，若是欲予母語復振ê工程，會當做起來有上好ê效率，政府首先愛做ê，就是拍廣告影片囥佇電視佮網路頂放送，就親像咧面對covid-19仝款，逐工拍開電視抑是手機仔攏看會著聽會著，予全民知影母語欲消失去ê嚴重性，逐家有意識，會仝心想欲來挽救強欲無脈ê母語，做伙來拍拚，就親像做伙來做防疫仝款，相信欲共母語救倒轉來，一定是緊早慢ê代誌！

 

(2)推廣頂面我建議ê推捒母語ê做法

    閣來佇廣告影片內面，愛閣將咱日常生活中會當按怎做ê方式，示範予全體ê民眾知影，按呢逐家佇生活當中就會當真自然來接觸母語、講母語、聽母語、使用母語，相信有建立起來友善ê母語環境，母語復振ê目標ê達成率，會愈來愈懸！

 

(3)政府抑是鼓勵私人機關ê考試，有通過母語認證者，提高加分ê比重

    考試一直攏是領導教學、影響學習上關鍵ê因素，現此時咱台灣ê學生囡仔抑是in ê序大人，袂主動學母語真關鍵ê一ê因素，就是升學考試無考抑是政府抑是私人機關抾人的時無考無加分！所以若是佇未來ê政府機關抑是私人機關，佇欲抾人入去政府機關抑是公司上班ê時，攏會當加入有通過母語認證ê加分制度，相信一定會當鼓舞閣較濟人來注重，甚至是會予大部份ê人主動來學習母語，該然頂面ê建議方式若是有法度來實現ê時，相信咱就會當免閣再煩惱母語欲消失去ê危機！

 

人講「有心開山，山成園；有心拍石，石成穿」，雖然頂面ê一寡做法有可能無法度隨做甲到，毋過相信只要咱逐家攏有心，逐家有強烈ê母語欲消失去ê危機意識，以及一ê想欲鬥陣做伙來創造經營母語友善環境，欲來做伙開始講母語，欲佇生活當中盡量來使用佮看重母語，我有信心，咱一定會當將母語抾轉來！

 

線頂完整的台文通訊BONG報 347期，2023年2月出刊 雜誌內文，請點下底的超連結來欣賞喔~

https://tsbp.tgb.org.tw/2015/03/beh-tshui-sak-lan-e-tang-ne.html

詩 | 廖啟助 | 山陀兒 (台文通訊 第368期)

 

        113年10月第一个對高雄登陸的風颱，對咱高雄造成足大的損害，連我家己蹛的鳳山社區佮服務的學校攏造成足大的損害，所以寫出這首詩來做紀念~向望咱所有的人愛疼惜咱的地球環境，毋通干焦自私想家己，一直來破壞大自然環境，造成「人無照天理、天無照甲子」的災害，私心計較，終其尾「千算萬算毋值得天一劃」，咱人類嘛是愛來受這ê罪業！

=================================================

【山陀兒】

 

廖啟助

 

山陀兒

是性地真䆀的𨑨迌囡仔

 

一下仔共樹仔捒捒倒

一下仔共厝頂掀掀去

一下仔共看板拆拆落

一下仔共玻璃摃摃破

一下仔共路仔沖沖歹(tshiâng)

一下仔共石壁偃偃倒

一下仔共橋跤沖沖斷(tshiong）

一下仔共轎車淹淹去

一下仔共水果菜蔬損斷了了

袂輸看任何代誌攏袂順眼

 

到底阮是佗位去得失你

 

抑是

你是天公伯仔

派來欲警告阮ê！

線頂完整的台文通訊BONG報 368期，2024年11月出刊 雜誌內文，請點下底的超連結來欣賞喔~

你可能沒見過的台灣童玩 EP13｜《這是台灣款》

日語用字也有台灣話 EP30｜《這是台灣款》

113 台語課的口語測驗範圍佮內容

真平版本第11冊.(點連結有超連結)

1. 所有的課文愛會曉讀，讀愈順分數愈懸。

    (P8-11,  26-29

2. 課本內面問答題的問題佮答案，愛會曉唸兼回答。

    (12-13,  30-31, 45,

3. 課本的語詞愛會曉念兼造句。 

    (14-15,  34-35,

4.  32頁 數字的文音讀法.

5.  39頁 縣市的名佮區域號碼愛會曉唸.

啟助 台中教育大學 本土意識宣講師 進階回流研習分享113.11.17 學員回饋

 

●你對今日啟助分享的內容, 啥物所在感受上深?  為啥物？

噗仔拍了真真心，啟助老師真實在

讚

主動鼓勵別人學台語的精神所感動

＂愛主動佮人相借問＂，因為彼是我上欠缺--ê

我上深e感覺就是講，我家己是成大台文研究台語文學出身e,不而過無定定拍台語字，而且現在所轉食e頭路甲台文嘛無關係。真佩服啟助老師遮呢認真推sak台語!

現此時台語的環境真不足，嘛無蓋友善，毋過啟助老師誠有推捒台語的熱誠！

家已做的實在無夠，因為影響的人傷少。

啟助自身做予別人看，兼主動邀請生活接觸的五色人講台語，加一个算一个。

和廠商的對話

用台語文佮所有的人接接。

講師個人特色😊

無簡單

●你有啥物話 抑是 建議想欲予啟助知 ？

加油，一定會有單位邀請您

讚

繼續打拼堅持下去，今天非常感謝你的分享

多謝啟助老師用心拍拚！有聽著講彼跤袋仔會使重新設計，按呢我嘛來做一跤！

後擺想愈聽啟助老師分享閣卡濟關係學校內面台語老師閣有學台語e學生的心得。歡迎老師來陽明山中山樓揣我tshit-tho喔!

感恩！

若有資源會當推拺台語，逐家愛互通消息，勞力。

感謝！勉勵的金句閣餾一改： 1.莫做斡（uat轉）頭族 2.大方大範有信心來講台語 3.有機會佮人開講的時，全台語拍台文 4.宣講師更加愛有使命感來主動分享講+寫打造台文景觀 5.加一个人講/寫台語，就加予咱的台語，予閣較濟人聽/看著 6.隨時主動將台語揀予人看著 聽著 讀著愈濟人講/看，台語才袂斷根台語才會久久長長來流傳~

感謝遮爾仔好的分享，內容對我有幫贊

多謝。多謝。

讚lah

做伙拍拼

啟助 鳳山區 中山國小 談交通安全教育的重要性 分享 1120412

鳳山區 中山國小 談交通安全教育的重要性 112.04.12

　    主任班同學佇中山國小服務，伊有聽in生教組長講我分享的「交通安全教育」內容袂䆀，所以伊就敲電話邀請我去in學校分享。有人無棄嫌我，願意予我有機會去分享，我當然足珍惜按呢的機會。中山國小的老師攏足認真學習，來參與進修的出席率誠懸，而且佇我問問題的時，真濟老師攏足大方嘛足認真佮我有交流對話，連校長嘛是自頭坐到尾，坐佇上頭前聽我分享，真正足感心的~

       真濟老師，包括校長在內，對我所分享的影片內容抑是講課的內容，攏真有感受，有體會著原來：交通安全教育絕對毋是干焦教囡仔「紅燈停、青燈行」遮爾簡單的代誌，有足濟幼路的所在愛提醒咱的學生囡仔抑是厝內面人，我嘛藉機會紹介「靖娟基金會」予中山國小的老師認捌，予逐家了解in佇交通安全教育的投入佮用心，校長聽了我的介紹了後嘛真肯定，想欲請學務處佮靖娟基金會來聯繫，看欲按怎將志工佮靖娟來合作，將阮四維做了好的部分，推展到中山國小。

       另外，這擺我除了佮頂擺仝款，全程至少用95%以上的台語來演講分享以外，我佇我的簡報頂面，專工揣一寡字較少的內容，共台語漢字拍佇頂面，予老師除了會當聽著我的台語分享，閣會當看著台語文出現的教師進修的場合，看著我按呢的安排，真濟坐佇下面的老師看著螢幕頂面的台語漢字，目睭攏金起來。下課的時，校長抑是幾位老師攏來問我敢是有咧教台語，抑無我的台語nài有法度講甲遮輾轉？我想我刁工用這步出來演講分享交通安全教育的重要性，閣兼共台語以及台語字推捒出來的做法，已經有開始產生一寡效果矣。向望有愈來愈濟的老師，做伙來關心囡仔的交通安全教育，嘛做伙關心台語欲滅亡的嚴重性，做伙佇生活中用台語溝通佮書寫表達，相信只要逐家有按呢的體會佮行動，交通安全教育佮台語的發展一定會愈來愈進步，予咱愈來愈放心~

     ps. 若是其他的學校有需要啟助去分享，我攏足願意去你的學校分享喔! 予咱做伙來關心囡仔的交通安全教育, 以及將好聽的台語講予閣較濟的老師佮朋友聽~

歡喜的記持 1.~學生會記得用台語共我拍招呼 113.11.27(三)

歡喜的記持 1.~學生會記得用台語共我拍招呼 113.11.27(三)

我當咧外口的走廊洗手，舊年予我教過的學生，對我的身軀邊仔行過來，準備欲去電腦教室上課，遠遠就用台語佮我問好：老師你好。

我講：哇，你足有禮貌的。心肝內當咧暗暗仔歡喜，想欲共呵咾講：哇，你猶會記得愛用台語佮老師拍招呼喔，我猶袂赴開喙，伊紲落來閣對隔壁的同學講：用台語佮老師問好啦~  

然後兩个人對我的邊仔行過去準備欲去上電腦課。

看著囡仔，遇著我，知影愛自動切過來佮我用台語問好拍招呼，而且閣會提醒隔壁的同學按呢做，實在是真古錐，心內嘛真有成就感~


ps. 頂面的圖是第一擺用canva 的 夢想實驗室 AI生成的~

【無事坐巴士】-農村武裝青年 主持人相放伴-BONUS版

蕃薯仔 é 詩情【台語詩人 林宗源】

家中, 只要有2人, 就可以報名參加 台語家庭 賺獎金

 

文化部的「台語家庭徵集活動」開始囉！

逐家做伙來申請台語家庭，
講台語，提獎金，閣有抽獎喔！
毋免驚，免客氣，只要有心欲講台語，
逐家攏會當申請喔！

申請網址佇下面留言區，
google: 國家語言數位資源網，
點「台語家庭」入去報名也ok喔！

報名網址：https://ntlgportal.moc.gov.tw/home/zh-tw/introduction

英語老師改途教台語 閣用母語創作寫小說 | 公視台語台 | 20240212

予啟助聽了感動甲目屎流的歌~阿母的話 #農村武裝青年

《阿母的話》A-bú ê Uē

農村武裝青年樂團 Lông-tshuan Bú-tsong Tshing-liân Ga̍k-thuân

------------------------------------------

細漢讀國校仔的時陣

sè-hàn tha̍k kok-hāu-á ê sî-tsūn

阮阿母𤆬我去學校

gún a-bú tshuā guá khì ha̍k-hāu

伊用生疏的華語講話

i iōng tshenn-soo ê Huâ-gí kóng-uē

帶著臺語的腔口

tuà tio̍h Tâi-gí ê khiunn-kháu

彼當陣

hit-tang-tsūn

我的心內

guá ê sim-lāi

是感覺真歹勢

sī kám-kak tsin pháinn-sè

彼當陣

hit-tang-tsūn

我的心內

guá ê sim-lāi

是感覺真歹勢

sī kám-kak tsin pháinn-sè

這馬換我

tsit-má uānn guá

𤆬你去學校

tshuā lí khì ha̍k-hāu

我用阿媽的話

guá iōng a-má ê uē

佮你講話

kah lí kóng-uē

有一工

ū-tsi̍t-kang

你敢會問我

lí kám ē mn̄g guá

咱兜講的話

lán tau kóng ê uē

哪會佮人無相仝

ná ē kah lâng bô sio-kâng

彼當陣

hit-tang-tsūn

你的心內

lí ê sim-lāi

敢會感覺真歹勢

kám ē kám-kak tsin pháinn-sè

彼當陣

hit-tang-tsūn

你的心內

lí ê sim-lāi

敢會感覺真歹勢

kám ē kám-kak tsin pháinn-sè

囡仔

gín-á

這是阿祖

tse sī a-tsóo

佮阿公阿媽講的話

kah a-kong a-má kóng ê uē

囡仔

gín-á

這是阿公阿媽

tse sī a-kong a-má

佮阿爸講的話

kah a-pah kóng ê uē

是我心內

sī guá sim-lāi

上媠的語言

siōng suí ê gí-giân

知影咱對佗位來

tsai-iánn lán tuì tó-uī lâi

是我心內

sī guá sim-lāi

上媠的語言

siōng suí ê gí-giân

知影欲對佗位去

tsai-iánn beh tuì tó-uī khì

是我心內

sī guá sim-lāi

上溫暖的語言

siōng un-luán ê gí-giân

是阿爸對你講的話

sī a-pah tuì lí kóng ê uē

阿母的話

a-bú ê uē

阿母的話

a-bú ê uē

目屎是掰袂離

ba̍k-sái sī pué buē-lī

阿母的話

a-bú ê uē

阿母的話

a-bú ê uē

是啥人割斷咱的喙舌

sī siáng kuah-tn̄g lán ê tshuì-tsi̍h

---

阿母的話

a-bú ê uē

阿母的話

a-bú ê uē

囥佇心肝內發芽

khǹg tī sim-kuann-lāi puh-gê

阿母的話

a-bú ê uē

阿母的話

a-bú ê uē

聽候春天欲開花

thìng-hāu tshun-thinn beh khui-hue

------------------------------------------

以上歌詞由 W.b. Chen 整理.
出處 https://www.facebook.com/groups/922800454445724/posts/7079421765450198/

【中文】這是一首讓我邊聽眼淚邊流的歌曲, 主唱阿達誠懇的分享他寫這首歌曲的原因，而且歌詞內也有很多和我相同的想法, 真的讓我非常的感動, 我要為聽這首《阿母的話》來寫一篇文章投稿, 而且還要將這部影片分享給我的家人, 朋友、同事, 以及我的學生一起來聽，而且要請學生回家分享給他的家人聽，讓更多的人可以一起來感動, 一起來繼續疼惜阿母的話, 一起來講阿母的話~ 這也是我第一次在 youtube買超級感謝, 小小的心意, 再次感謝阿達寫出這麼感動、這麼漂亮的台語歌曲，講出我這個做阿爸的心聲！ 邀請所有的好朋友, 你若是聽了和我一樣有所感動, 請用行動來相挺「農村武裝青年」，讓他們 更加有底氣，可以繼續來創作, 讓我們可以一起來感受、享受更多 阿母的話 的歌曲~

最後最重要的是 請所有的好朋友, 繼續把這首歌分享給你的好朋友來聽, 一起來講阿母的話哦~

ps.建議聽《阿母的話》, 就聽成大演唱會這個版本, 有上字幕, 而且個人覺得也是現場的音色音效最好聽的版本，另外還一個超級重要的地方→

在聽這首歌時, 記得 一定要放下手邊工作與家事, 讓自己的心能靜下來，專心的聽他們對話, 才能去體會出作者的感受及為何他要寫這首歌的原由，才能被這首歌感動喔~~

 

【台文】這是一首予我那聽目屎那流的歌, 主唱阿達誠懇分享伊寫首歌曲的原因，而且歌詞內面嘛有足濟佮我仝款的想法, 真正予我非常的感動, 我欲為聽這首《阿母的話》來寫一篇文章投稿, 而且閣愛將這塊影片分享予我的厝內面人, 朋友、同事, 以及我的學生做伙來聽，而且欲請學生轉去厝分享予伊的厝內面人聽，予愈濟人會當做伙來感動, 做伙來繼續疼惜阿母的話, 做伙來講阿母的話~ 這嘛是我第一擺佇 youtube買超級感謝, 一點點仔心意, 再次感謝阿達寫出遮呢感動 遮呢媠的台語歌曲，講出我這个做阿爸的心聲！ 邀請所有的好朋友, 你若是聽了佮我仝款有所感動, 用行動來相伨 農村武裝青年，予in 閣較有底氣，會當繼續來創作, 予咱會當做伙來感受 享受閣較濟 阿母的話 的歌曲~ 上尾仔上重要的是 請所有的好朋友, 繼續共這首歌分享予你的好朋友做伙來聽, 做伙來講阿母的話哦~

ps.建議聽《阿母的話》, 就聽成大演唱會這个版本, 有字幕通看, 而且個人嘛感覺這嘛是現場的音色音效上好聽的版本，另外猶有一个超級重要的所在→

咧聽這首歌的時, 會記得 一定愛共手lìn的工課先停落來,予家己的心會當靜落來，專心仔聽in的對話, 才有法度去體會出作者的感受佮為啥物伊欲寫這首歌的原因，才有法度予這首歌感動喔~~