台語是我ê母語，我感覺台語非常ê媠，可惜佇我服務ê國小有2300外ê學生囡仔，抑是我ê查某囝讀ê國中，差不多有2600外人，下課差不多攏無人咧用台語開講！佇兩間這爾大間的國中國小【學校】內面，攏總差不多有將近5000ê囡仔，結果in差不多攏無咧講母語，當然我想佇其他的學校的嚴重性應該嘛精差無濟！佇我蹛ê【社區】尤其是公園內，身軀邊仔嘛足少聽著人講台語，尤其是40歲以下ê人，會當講是無té聽！阿公阿媽佮40外歲以下ê爸母差不多攏用華語佮囡仔佮孫仔講話，種種ê狀況，予我意識著台語真正欲滅亡矣！所以咱一定愛緊共這ê台語欲無去矣ê危機講予逐家知！
欲按怎共母語救轉來，咱會當按呢做：
1.
愛有母語欲消失去ê危機意識！
過去是政策對母語ê打壓，這馬是逐家無意識著母語欲消失去ê意識，無體會感受著母語消失ê速度佮嚴重性，所以咱一定愛盡量予咱身軀邊ê人，會當去意識著母語欲消失去ê危機，而且愛予愈濟人知影愈好，按呢才有法度鬥陣來挽回。
2.
愛知影語言ê消失就是這ê文化ê消失
語言是文化ê載體，嘛是文化ê一部分，語言一旦消失，這ê文化就會綴咧消失，所以咱愛有傳承母語佮文化ê使命感，予咱ê後輩會當久久長長，去聽著/看著咱ê母語佮文化一代傳一代流傳落去！
3.【佇學校】營造講母語ê友善環境
(1)對校長/主任/所有ê老師做伙有意識使用母語
囡仔佇學校ê時間上長，加上同學之間ê影響力是上大，所以教育部佮教育局愛把握這段黃金時期，佇上課課程以外，加強營造母語友善環境來做起！愛呼籲咱ê學校，對校長/主任/所有ê老師做伙來做起，予老師會當有意識ê使用母語，平常時仔加用台語來溝通，予學生囡仔會當看著原來我ê老師in是遮爾愛用母語來開講交流！
(2)將母語佮生活結合，所有科目，攏盡量加減用母語來教課
母語是生活中ê母語，毋是干焦上母語課ê母語，所以邀請所有教課ê老師，每一科目攏會當加用寡母語來講課紹介，予囡仔會當佇生活中看著感受著，原來母語是會當使用佇其他科目學習頂面，而且傳承母語，是所有老師ê工課，毋是干焦教母語課ê老師ê代誌！
(3)請導師主動佮班上ê囡仔講母語
導師佮囡仔鬥陣ê時間上長，對囡仔ê影響力甚至比爸母閣較大，所以營造一ê友善ê母語環境，真重要ê一部分是請導師主動佮囡仔講母語，尤其是下課時間，按呢囡仔in就會感覺我ê老師/我ê校長/主任攏咧講母語，原來講母語是真正四常ê代誌，免歹勢嘛袂奇怪，按呢ê效果會上好！
(4)將講母語列入班上獎勵制度
重賞之下必有勇夫！大部分ê囡仔攏足有榮譽感，所以佇導師ê班上獎勵制度頂面，若是會當將講母語囥入去班上每一工ê獎勵制度內面，按呢ê推捒效果會閣較好，因為囡仔攏會想欲爭取加分，透過獎勵，囡仔會愈骨力愈勤快去使用母語！
(5)予囡仔看會著/聽會著/感受會著，講母語是足四常ê代誌
任何語言ê學習攏是透過「聽、講、讀、寫」這四ê順序。所以咱ê囡仔，佇生活中若是會當聽著有夠濟ê母語，in自然就會曉開喙講母語，予in袂感覺講母語是足奇怪抑是ngāi-gio̍h ê的代誌，甚至咱若會當營造出來講母語是時行又閣奅ê代誌時，囡仔佮同伴之間就會互相影響，互相相thuā，按呢ê效果會比老師佇台仔頂咧教閣較緊，這就是【佇學校】營造講母語ê友善環境ê重要性！
4.【佇厝裡】爸母有意識先講母語~做囡仔ê模範
(1)爸母先做模範，講予囡仔看/講予囡仔聽/講予囡仔學
除了學校老師ê牽教，爸母ê支持佮示範，對囡仔學母語嘛是非常ê重要，所以咱作序大人ê人，愛先做模範，講予囡仔看/講予囡仔聽/講予囡仔學，囡仔自然就會來接受兼接收咱ê母語。
(2) 捷講喙會順~免有壓力/免驚袂輾轉/免歹勢
學任何語言攏仝款，捷講喙會順，捷寫手袂鈍，所以咱講母語嘛是仝款，ta̋nn開始ê時，一定會拄著袂曉講，抑是講袂輾轉ê時陣，咱毋免有壓力，會曉guā濟講guā濟，免驚人笑，中文透濫嘛無要緊，攏免歹勢，相信只要「聽佮講ê量有夠濟」，自然就會進步~
(3)阿公阿媽愛看重家己ê母語，主動佮囡仔佮孫仔講母語
阿公佮阿媽ê母語是厝內面講了上正pān上純正ê人，所以咱做阿公阿媽ê人愛看重家己ê母語，愛主動佮序細抑是孫仔講母語，按呢厝內面人才有法度去聽著學著端的又閣媠氣ê母語，咱ê母語欲久長傳承落去ê機會就會愈懸，所以一定愛請咱ê阿公阿媽看重家己ê母語，主動佮囡仔佮孫仔講母語，予母語通繼續傳承落去。
(4)向人請教兼主動查辭典
學語言ê過程中，一定會去tng著袂曉抑是無確定ê代誌，這咧時陣咱就愛發揮活到老，學到老ê精神，主動去請教身軀邊ê tshia̋n-pái抑是長輩，抑無就愛主動去查辭典，按呢咱就會當學著愈來愈濟、愈來愈深、愈來愈闊ê母語！
5.【請政府】拍廣告 / 影片放送予全民知
(1)呼籲大眾母語得欲消失去ê危機
現此時母語無法復振，上大ê原因就是大家無母語意識，尤其是毋知影母語消失ê速度佮嚴重性，以及母語消失對咱ê文化抑是對咱ê台灣ê損失，這是佇過去咱ê社會，尤其是升學制度抑是工商社會當中，逐家長期以來攏無去注重佮意識ê所在。所以現此時，若是欲予母語復振ê工程，會當做起來有上好ê效率，政府首先愛做ê，就是拍廣告影片囥佇電視佮網路頂放送，就親像咧面對covid-19仝款，逐工拍開電視抑是手機仔攏看會著聽會著，予全民知影母語欲消失去ê嚴重性，逐家有意識，會仝心想欲來挽救強欲無脈ê母語，做伙來拍拚，就親像做伙來做防疫仝款，相信欲共母語救倒轉來，一定是緊早慢ê代誌！
(2)推廣頂面我建議ê推捒母語ê做法
閣來佇廣告影片內面，愛閣將咱日常生活中會當按怎做ê方式，示範予全體ê民眾知影，按呢逐家佇生活當中就會當真自然來接觸母語、講母語、聽母語、使用母語，相信有建立起來友善ê母語環境，母語復振ê目標ê達成率，會愈來愈懸！
(3)政府抑是鼓勵私人機關ê考試，有通過母語認證者，提高加分ê比重
考試一直攏是領導教學、影響學習上關鍵ê因素，現此時咱台灣ê學生囡仔抑是in ê序大人，袂主動學母語真關鍵ê一ê因素，就是升學考試無考抑是政府抑是私人機關抾人的時無考無加分！所以若是佇未來ê政府機關抑是私人機關，佇欲抾人入去政府機關抑是公司上班ê時，攏會當加入有通過母語認證ê加分制度，相信一定會當鼓舞閣較濟人來注重，甚至是會予大部份ê人主動來學習母語，該然頂面ê建議方式若是有法度來實現ê時，相信咱就會當免閣再煩惱母語欲消失去ê危機！
人講「有心開山，山成園；有心拍石，石成穿」，雖然頂面ê一寡做法有可能無法度隨做甲到，毋過相信只要咱逐家攏有心，逐家有強烈ê母語欲消失去ê危機意識，以及一ê想欲鬥陣做伙來創造經營母語友善環境，欲來做伙開始講母語，欲佇生活當中盡量來使用佮看重母語，我有信心，咱一定會當將母語抾轉來！
線頂完整的台文通訊BONG報 347期，2023年2月出刊 雜誌內文，請點下底的超連結來欣賞喔~
https://tsbp.tgb.org.tw/2015/03/beh-tshui-sak-lan-e-tang-ne.html
沒有留言:
張貼留言
歡迎留言給我