皮包仔無去矣 (劇本)

 第十一冊 第一課 驚著無代誌  《皮包仔無去矣》

場景：人潮洶湧的夜市

口白：拜五下暗，丸仔規家伙仔歡歡喜喜咧踅夜市。

（那踅那討論欲食啥物，逐擔看起來攏真好食款，看甲喙瀾強欲津落來矣。）

丸仔：我欲食燒番麥、臭豆腐、蚵仔煎，閣有麵線佮牛排！

豆仔：敢袂傷濟？你食袂了啦！

阿母：無，咱會當每一種攏叫一份，規家伙仔做伙食。

阿爸：好啊、好啊，就按呢決定矣！

場景：人來人往的夜市

（阿母徛佇擔仔位頭前咧揣皮包仔，面色愈來愈緊張。）

阿母：奇怪，是走去佗位？

豆仔：阿母，發生啥物代誌矣？

阿母：我出門進前明明有紮皮包仔，哪會揣無？

阿爸：我看咱照原路行轉去揣好矣。

（規家伙仔那行那揣的時，阿母雄雄接著電話。）

阿母：喂──

對方(警察)：請問，你敢是廖惠美小姐？

阿母：是，請問佗位揣？

對方(警察)：我遮是真平派出所，有人抾著你的皮包仔送過來，你這馬敢有閒過來一逝？

阿母：好、好、好，我隨過去。

警察：廖惠美小姐，有人佇夜市仔門口抾著你的皮包仔送過來，你檢查看覓內底的現金、證件佮信用卡敢有無去，若無問題就會使提轉去矣。

阿母：攏佇咧，無問題，多謝啦！

阿爸：啥？佇門口就落去矣，毋就好佳哉拄著好心的人，無，這聲就害矣。

警察：是啦！所以後擺愛較細膩咧。

（豆仔佮丸仔咧開講，看起來真歡喜。）

丸仔：足新奇的，這是我頭一擺來派出所呢！

豆仔：著啊，警察看起來足厲害的！

阿母：以後恁若是抾著別人的皮包仔，第一時間嘛愛送來派出所，因為無去的人會足煩惱的。

阿爸：恁若是無送派出所，共紮轉去厝裡，顛倒有可能去予人告侵占，按呢就犯罪矣，知無？

丸仔、豆仔：阮知矣！