雖然我關心推捒台語真濟冬矣，毋過因為過去攏是教資優班抑是社會科，所以雖然捌鬥相共指導學生，毋過人數並無濟，若是親身正式掛名落去指導學生參加台語演講的學生，今年可能只是第3个抑是第4个學生爾爾。
今年的指導學生，是一个4年的同學， 年紀雖然有較細，毋過因為學生的厝內面人有配合， 規家伙仔盡量營造出台語家庭的環境，加上學生肯練，家長用心配合要求訓練，以及導師鬥相共，才有今仔日的好成果！
看著學生會當提第一名，嘛是我指導學生演講以來第一个提著第一名的學生，雖然只是初賽，毋過我家己比學生閣較歡喜，表示我主張的「生活台語化、台語生活化」的實踐是真正對台語能力有真大的幫贊！向望佮學生以及家長繼續拍拚，繼續佇生活中講台語、用台語甚至是寫台文，累積家己的台語實力，佇後面的比賽得著好成績，來證明「生活台語化、台語生活化」的實踐理念重要性！
若是看我的文章了後, 有一寡想法，歡迎你佇下面留話予啟助，多謝。💞
沒有留言:
張貼留言
歡迎留言給我