非常感謝雅婷老師用心撥工整理學生囡仔的回饋單，我特別邀請我的細漢查某囝佮我鬥陣看in手寫的回饋單，細漢查某囝講：哇，in的字哪會攏遐媠，有一个佮我寫的字足成呢，in寫的內容是按怎來的？哪有法度寫甲遐完整？
我講：因為in上課攏真專心真用心，閣加上阿爸的上課方式真趣味，所以in當然就學著足濟矣！（總是愛佇家己的查某囝面頭前家己褒一下🤣）
我看著in寫的內容予我足感動，尤其是大部分的囡仔in的字毋若認真寫，字體閣足媠的，而且閣會當共in佇課堂學著的代誌抑是心情描寫出來，其中猶有幾若个有感受著：
我除了欲教in 菸害防治，嘛順紲咧推廣台語，真正足歡喜，in有共我想欲傳送予in的禮物收著。
所以邀請所有想欲推廣台語的好朋友，佇生活當中，咱會當有意識使用台語佮囡仔做伙來分享、交流智識，大部分的囡仔攏聽有(免驚in聽無)，in嘛會當感受著咱想欲傳承台語的心意喔~
最後再次感謝雅婷老師對我的肯定邀請，我才有機會來佮新光國小的囡仔交流，而且閣佇宣講活動了後辛苦整理資料佮分享，我才有今仔的資料佮逐家分享，真正足感恩的~💕
這馬咱就來看新光國小學生囡仔，上我的菸害防制課程了後的心得(請點圖片放大來看喔)，學生的回饋足精彩，請點下底的相片，一張一張欣賞喔~ (若是用手機仔看學生寫的內容，請將手機仔設定做會自動轉橫的，按呢看學生寫的字才會較大字較清楚喔)
若是看我的文章了後, 有一寡想法，歡迎你佇下面留話予啟助，多謝。💞
囡仔聽啟助老師的演講了後講：「驚覺菸是多麼恐怖！不過還沒完，除了學到吸菸的嚴重性，我也學到了一些有關菸的閩南語，像是『食薰』這個詞我就十分有印象！」囡仔學著莫食薰＆台語，一兼二顧，演講的高手，想起啟助老師講的：台語生活化，生活台語化！
回覆刪除感謝這位來賓的留話鼓勵，演講的高手不敢當啦，拄仔囡仔佮意上咱的課， 閣有將我想欲教in的台語記佇心肝頭，確實真感心。咱做伙來鼓舞身軀邊仔的人鬥陣來講台語, 予台語生活化，生活台語化喔！
刪除