運氣真好，教著群皓這个囡仔，骨力肯學，更加重要的是規家伙攏真配合我的指導，佇厝內面一直會當提醒家己開喙講台語，予規厝內面人一直會當保持佇一个母語的家庭環境，甚至連原底講台語會加減透濫華語的阿媽，尾仔佇 Line群組內面嘛開始佮我拍台文，連訊息嘛用台語咧溝通，真正足使人感動。
看著規內面人攏遮要意台語這件代誌，我當然嘛愛撥時間費精神來共指導。群皓這个囡仔毋驚艱苦，會kham得食苦，真耐操，我交待的代誌，轉去厝了後，阿公阿媽爸爸媽媽攏會配合繼續練，甚至歇熱抑是開校放學了後，一禮拜攏閣至少留落來練4-5點鐘，真正是無簡單~
下暗成績放榜，看著群皓規厝內面人攏足歡喜的，除了媽媽親身敲電話來佮我分享好消息以外，阿媽嘛專工敲電話來共我說多謝，佮我分享群皓佇台北102歳的阿祖嘛攏替伊歡喜甲，講若是無我的指導，群皓嘛無今仔日的成績，我講這毋是我一个人的功勞，這是咱親師生共同合作的美好成果，因為若無序大人佇厝的配合訓練，干焦靠我佮群皓是絕對無可能有遮好成績，所以我勉勵in，一定愛記得規家伙仔繼續保持開喙就是全台語，按呢才會當繼續提升群皓佇全國賽的表現，向望咱用行動來證明，生活台語化，台語生活化佇家庭推捒的重要性，用台語家庭的行動來提全國賽的獎盃～
沒有留言:
張貼留言
歡迎留言給我