記錄風颱天， 逐家做伙出來鋸樹仔、整理校園環境的溫暖過程,
邀請逐家做伙來讀看覓~
散文 | 廖啟助 | 天公疼戇人 (台文通訊 第389期 )
「阿爸，新聞毋是已經報講今仔日停班停課，你哪會閣趕欲去上班？」阮查某囝按呢問，我講：「因為風颱來，毋但共學校的樹仔吹甲東倒西歪閣倒規大倒，需要去鬥鋸樹仔整理環境！」伊應：「hóo，你真正有夠戇的，明明電視就宣佈講會當佇厝歇睏，你閣硬欲拚去學校做工課，真正予你拍敗矣！」
雖然停班停課，毋過校長煩惱倒去的樹仔，會影響民眾佮學生家長佇學校出入的安全，伊希望會當趕緊共校園的環境復原。伊請總務主任招看有人會當來鬥相共無，想袂到主任佇群組一下呼，包掛校長、主任，隨有7-8个人會當來鬥相伨。
人講工夫好，嘛愛家私齊(tsiâu），現此時已經有人欲來鬥相共矣，紲落來就是愛有家私，其中上重要的就是電鋸！學校有蓄（hak）一台電鋸，會當較省力省時來鋸樹仔。毋過干焦一台，用久嘛是會鈍去，所以尾仔油閣按怎摧，樹枝就是鋸袂斷。校長請工友先歇睏，我嘛贊聲講：「著啦，有可能鏈仔鈍去矣，我來共電鋸載去予頭家看會當處理無？恁先啉一下仔水歇一下。」
去到五金行，我問頭家：「這電鋸的鏈仔敢有法度磨？」頭家應講：「會使啊！毋閣你愛等喔！」我講：「無要緊，因為學校的樹仔倒太濟咧，若無這支電鋸真正做無路來。」頭家一下聽著我講是學校欲用的，隨應講：「原來是學校欲用的，按呢我先來共你磨。」
我趕緊共頭家說多謝，閣問頭家按呢愛偌濟錢，頭家講：「算你100就好！」我聽一下心內想講：「哇，哪會遮好，頭家欲共我鬥磨，毋免換新鏈仔，就已經省真大條矣，想袂到磨鏈仔的工錢嘛算遮爾俗，真正趁著矣！」
電鋸磨利了後，阮閣繼續鋸，繼續整理環境，等阮攏款甲差不多的時，天開始咧滴雨。人講「有願就有力」，當當你決心想欲去做一項代誌，全世界的力量攏會集中起來共咱鬥相共。看著這工來學校處理倒去的樹仔遮爾順序，問題一項仔一項解決，雨嘛閬予阮好做工課。雖然阮這陣人看起來真戇，煞是天公伯仔上疼惜的戇人。
線頂完整的台文通訊BONG報 389期，2026年8月出刊 雜誌內文
沒有留言:
張貼留言
歡迎留言給我