免驚歹勢 咱𤆬頭來講台語
作者：廖啟助
今仔日又閣是三個月一擺的捐血日子，我看著冰箱頂的明信片，提醒家己今仔愛繼續來捐血，毋若會當幫助有需要的人，閣會當予家己體內的血新陳代謝，真正是一兼二顧，助人閣利己。
來到捐血站，猶原攏無聽著人咧講台語，毋管是志工抑是護理師攏仝款是用中文來服務遮的愛心人士。我猶原是行到tueh，台語就講到tueh，毋管身軀邊有偌濟人咧講華語，我仝款是真大範真自在全台語佮身軀邊仔的人接接溝通，一點仔都袂歹勢，邊仔服務的志工，繼續用華語來問我的基本資料，共我量血壓，無要緊，我嘛是繼續用台語來回答伊問的問題。
真緊我就來到捐血車頂面，紲落來就是入去一間細ka間仔的訪談室，由護理師問欲來捐血的人一寡較私人的問題，我照常用台語回答伊，伊問煞了後，換我問伊，我講：恁這馬做護理師的人，嘛足少講台語矣honnh？
伊用台語回答我：是啦！因為攏無人咧講，阮就足少佮人講矣。了後，因為後壁真濟人咧排隊等欲入去訪談驗血，所以我就無閣繼續佮這位護理師開講，行出來外口的椅仔頂坐，恬恬仔觀察來捐血的人佮護理師攏用啥物語言溝通。
換我坐落去捐血的膨椅頂面，護理師仝款用華語確定我的基本資料，我照仝用台語回答伊，結果這位護理師主動用台語對我講：你敢是進前捌佇消防隊遐捐過血？
我講：著啊，你哪會知？
因為我會認得你的聲，而且你攏講台語。
我講：是啊，原來你是頂擺我共你鼓勵愛較捷講台語予其他來捐血的人聽，彼位我講你的台語講了真好聽的護士？伊講：是呀！
我真歡喜閣共講，你敢知，咱彼擺捐血了，我閣專工去寫一篇《來捐血兼鼓舞護理師講台語》的文章去投稿，閣有錄取喔！你看就佇遮，我隨揤手機仔予伊看。伊講：哇！你真正足有心呢！
阮就按呢那捐血，那用台語開講，邊仔咧抽血的另外一位護士，嘛開始用台語佮伊的同事拍抐涼，紲落來來捐血的一位阿伯仔，聽著阮咧講台語，原底用華語報名姓了，嘛開始綴阮用台語做伙開講。
後來一位阿公𤆬一个2-3歲的查某孫做伙起來欲捐血，伊頭起先嘛攏佮in孫講華語，我就專工用台語去佮這个妹妹拍招呼，妹妹攏聽無，我就繼續用台語閣講一擺予伊聽，順紲用華語解說予妹妹聽。
佇對面頭拄仔先起來的彼位阿伯仔，看著這咧狀況就開喙講：對啦，咱猶是愛盡量佮囡仔講台語，若無你看這馬的囡仔攏聽無！
我嘛綴咧閣補充講：免煩惱囡仔聽無，頭起先囡仔聽無是足四常的代誌，毋過只要咱有堅持佮囡仔講台語，時間一下久，囡仔自然就攏會曉聽，甚至是會曉開喙講台語！
彼位阿公聽阮按呢講，嘛應講：是啦。紲luè，我就聽著伊沓沓仔加用一寡台語佮in阿孫講話，捐血車頂面佇這咧時陣，毋管是護理師抑是民眾，開始愈來愈濟人咧用台語開講。
所以我佮現場的人講：咱這馬的社會氛圍就是親像這馬按呢，頭起先攏無啥人咧講台語，毋過只要有人願意開始開喙講台語，堅持繼續講台語，身軀邊仔的人，就會寬寬仔予咱𤆬起來，嘛開始綴咱講台語，開始將台語抾轉來。所以邀請咱在坐所有會曉講台語的人，毋免驚歹勢，咱𤆬頭來講台語，予台語會當繼續傳落去！
線頂完整的台文通訊BONG報 371期，2025年2月出刊 雜誌內文， 請點下底的超連結來欣賞喔~ https://tsbp.tgb.org.tw/2015/03/lan-tshua.html
沒有留言:
張貼留言
歡迎留言給我