散文 | 廖啟助 | 參加霹靂盛典演唱會ê感想 (台文通訊 第373期 )

舊年113年10月去海洋音樂館參加參加霹靂盛典演唱會ê感想, 將我的失望的心情紀錄落來去投稿，因為無台語，就無布袋戲，更加無台語文化產業！ 感謝台文通訊編輯老師的肯定刊登，邀請所有的好朋友，撥工來讀看覓，更加歡迎所有的好朋友，將你看了的想法留話予我，咱會當做伙來討論~ 勞力~

作者：廖啟助

細漢ê我，看藏鏡人、烏白郎君、史艷文、秦假仙、荒野金刀獨眼龍，聽〈苦海女神龍〉、〈粉紅色的腰帶〉遮ê歌大漢。

毋過後--來，因為去外位讀冊無時間，所以布袋戲就無閣看--落-去，嘛因為無看霹靂相關ê節目，我想講我佮霹靂無熟，所以阮學校有報名抽獎送「霹靂盛典」演唱會門票ê活動，我就無去鬥鬧熱，想講共機會讓予別人。想袂到隔轉工一位家長專工敲電話予--我，講伊拄仔好有門票，伊知影我對台語真關心，所以特別留票欲送予--我，真正是足感心--ê。

看著家長遮熱心，我後--來想想--leh，講家己是台語人，結果煞無來參加霹靂盛典ê演唱會實在是講袂過，我想這應該是天公伯-仔ê安排，所以我就專工撥工來--矣。

入來到現場，看著坐甲插插插ê觀眾，我量其約共估計可能上無有3、4,000人，尤其是坐佇我邊--仔 ê人，差不多攏30 捅歲，每一首歌攏會曉唱。而且看in激動ê心情，喝咻甲有夠大聲，唱甲有夠熱情，予我深深感受著in對霹靂癡迷ê心，嘛予我對台語ê文化傳承閣有一點點仔向望。

規場ê表演攏真精彩，其中我感受上深--ê是聽西卿唱歌，一--來是伊唱我細漢愛聽ê歌，二--來是伊已經72歲--ah，猶閣有法度唱現場--ê，而且聲線聽--起-來猶真有氣力，元氣十足，氣色看--起-來嘛猶真好，予我非常敬佩。

毋過予我感覺可惜--ê是——大部份歌手攏講華語，kan-na一位查某歌手模仿豬哥亮講幾句仔台語，就無--矣。連荒山亮這位有leh 佇電視頂做台語節目主持ê歌手，嘛是講華語共逐家sio借問。猶閣有現場ê主持人嘛仝款kan-na講華語來主持！佇台語布袋戲ê演唱會，結果除了唱歌以外，賰--ê 攏講華語，真正予我感覺真失望！所以尾--仔我感覺我已經看袂落--去--矣，就先走--矣。聽其他ê朋友講，佇上尾--仔謝幕ê時，荒山亮有用台語表達伊ê感謝，毋過其他ê歌手就若親像無法度用台語來表達。

我想，真有可能主辦單位佮這-ê歌手，應該是無台語tih-欲消失--去ê危機意識，而且真有可能，in家己佇日常生活中，嘛攏真罕得用台語來佮人開講tsih接，所以真慣勢佇台仔頂就是用華語來sio借問。

若是主持人kah所有ê歌手攏有台語傳承ê危機意識，平常時有leh講台語，就會當好好仔把握這擺ê機會，tī現場用台語來kā所有ê人sio借問，佮台跤ê觀眾朋友用台語開講，鼓舞逐家做伙來講台語，予愈來愈濟人會曉講台語、願意講台語，予台語會當繼續傳--落-去，予台語大pha尾。

按呢布袋戲敢毋是會當予愈濟人來佮意，嘛會當予愈來愈濟人kah意來唱台語歌--leh？若無，等甲真正攏無啥人leh講台語ê hit个時陣，閣賰偌濟人ē想欲來看布袋戲？閣賰偌濟人ē想欲來唱台語歌、買台語專輯，到時敢閣有台語ê市場？

作者註：寫tī 2024年10月20，記錄高雄海洋音樂館霹靂盛典演唱會ê感想。

線頂完整的台文通訊BONG報 373期，2025年4月出刊 雜誌內文， 請點下底的超連結來欣賞喔~ https://tsbp.tgb.org.tw/2015/05/e_93.html