20 幫助別人就是上大的享受 │廖啟助│114年全國語文競賽(教師/社會組 ) 台語朗讀文章

 

114年全國語文競賽-台語朗讀文章(教師/社會組) 第20篇 出處 佮下載的所在

https://reurl.cc/qa2QQR

       真濟老師攏無佮意做行政, 尤其是聽著若欲接生教組長抑是事務組長這兩缺, 特別是佇大間學校服務的人, 大部分攏會走敢若飛咧 ^^ 可能我是庄跤囡仔的個性, 較袂想遐濟, 想講大部分的人攏會有無拄好,需要人鬥相共的時陣, 我就抱著將心比心的想法來接這兩項工課, 佇咱做會到的範圍盡量替人鬥解決問題做出發點來做代誌。 佇做的過程當中, 共我的一寡仔感想做整理,就完成這篇我平常時仔佇學校做行政的紀錄。雖然佇咧做的過程當中有時無遐輕鬆抑是無遐簡單, 毋過看著家長,同事,抑是學生囡仔的笑容, 佮in對我的感謝, 感覺這个過程真正足有成就感,邀請逐家做伙來讀看覓~

       另外,真歡喜！ 頭拄才發現我這篇文章, 竟然有受著 「台語巢讀冊會」的肯定, 收做in 佇116.07.03線頂讀冊會討論的文章, 真正足感謝in的分享, 向望我的文章會當予逐家對做代誌有無仝款的看法佮心態, 相信只要想法改變, 你的心態佮心情攏會愈來愈好喔~

圖片出處  https://www.facebook.com/photo?fbid=1313813790965194&set=a.540957068250874

文章閱讀, 請揤(按)下面閱讀更多

20 幫助別人就是上大的享受

廖啟助

        啥物是享受？有人講會當免上班上課，睏甲日頭曝尻川是享受；有人講會當耍手機仔、拍電動攏無人管是享受；有人講會當佮朋友做伙去耍、食好料的兼練仙是享受。毋過對我來講，會當去共人鬥相共、替人解決問題才是上大的享受。

        佇學校我捌做過特教、生教佮事務組長，其中生教組長做四冬。講著生教組這缺，我相信講有佇學校服務過的人攏知影，這是一個無好做閣捷予人嫌的穡頭。尤其佇我服務的學校，學生有兩千三百外人，全校干焦我佮學務主任兩个咧排解遮的囡仔冤家相拍、家長佮老師抑是家長之間的撞突，煞欲相告的麻煩代，閣有性平事件、上下課交通導護的工課愛發落。有時陣若拄著較無明理的家長，閣會舞甲公親變事主，欲來告我佮主任，沓沓滴滴的齣頭是有夠濟，想著就烏暗眩。莫怪少年隊的警官對我講：「我看大部份生教組長的保存期限攏是一冬，今年呔會閣是你？」

        講著事務組，見若風颱來，我就無閒𩑾𩑾。學校的樹仔毋是倒去，就是予風颱搧甲東倒西歪，所以鋸樹仔、剉樹仔、掃落葉、通水溝、清地下室淹水是誠四常的代誌。平常時仔飲水機無水；水道頭抑是冷氣滴水；電風、電火、電視、電梯故障；投影機有問題；便所窒咧袂通；mòo-tà袂絞水；鐵門拍袂開；影印機印袂出來、遮的lok--ko-sok--ko的問題，定定就愛傱甲大粒汗、細粒汗。

        同事攏講我頭殼敢有歹去，輕可的工課毋做，欲去接遮的歹剃頭的行政。我翻頭共想想咧，看著咱對囡仔的牽教，予in愈來愈有禮貌、愈來愈捌代誌；原底會冤家相拍，這馬會和好做伙耍；家長佮家長抑是同事之間，因為咱共in心內的結敨開，這馬會相借問；學生看著同學著傷抑是衝突、學校有物件歹去，知影愛緊來揣我去鬥處理；學生厝裡有困難，咱去門申請補助，予in會當較好過；同事教學設備出狀況，咱去共支援鬥解決；別人有需要咱，我就將心比心去相伨。看著in的笑容佮對咱的感謝，就是我上大的享受。