《有緣tsiah ē做親人，
包容創造幸福ê人生》/廖啟助
古早人咧講：「無冤無家，不成夫妻」。 前世若無相欠債，這世嘛袂做夫妻。會做厝內面人抑是親情(tsiânn)，攏是過去世有真深的因緣，尤其是可能過去有互相虧欠，才有這世ê緣份。
人佮人的鬥陣，因為外口人無一定會吞忍--咱，加上對外，咱一般人攏會希望維持一个好的形象，所以咱往往(óng-óng / íng-íng)攏會對外口人加(ke)真客氣！毋過，若是下班抑是下課轉來到厝，因為是厝內面人，咱佮人的互動就會變做真直接，無閣戴一个小(siáu)鬼仔殼，定定(tiānn-tiānn)講話抑是做代誌就較袂去顧慮對方的感受，無閣遐爾(hiah-nī)客氣，這个時陣就會造成衝突無爽快！
厝內面人若是khí-mooh-tsih無拄好的時，毋管伊是囡仔、翁某、序大人，抑是其他的親情(tsiânn)，若是對方予咱受氣，咱應該共看做是咱咧將過去虧欠伊的部分還--伊，毋是對方咧共咱糟躂(tsau-that)抑是揣麻煩，閣較莫想欲去討--轉來，按呢咱的心情就較袂受影響嘛較會自在。
世界上無人是十全十美--的，人人攏有缺點，銀角仔無兩ê袂霆(tân)，無的確是咱先去觸(tshik)著人的意，抑是咱先講話聲嗽無好，內容傷薟(siunn hiam)、傷鹹、傷利，才會予對方擋袂牢(bē tiâu)，人才會變(pìnn)面佮咱冤家。所以若是遇著佮厝內面人起毛䆀(khí-moo bái)的時，咱無需要去爭輸贏，龜跤龜內肉，平平攏是厝內面人，拍甲對方受傷，家己嘛會損著筋骨，無人會總贏，家和才會萬事興，家亂萬世窮。
人講受氣就是提別人ê錯誤咧處罰家己，而且氣死是驗無傷，所以咱愛學較巧--咧，人生在世ê時間只有短短ê 3萬外日，每過一工，美好的生命就減少一工。所以咱愛好好仔珍惜，對家己較好--咧，凡事看予開，歡喜上重要；前跤欲行，後跤就愛放，想欲有幸福的日子，就愛將過去無爽快的代誌放下，咱才有法度行向美好的未來。
佇地球頂面，現此時有超過82億人，咱愛有足深的緣份才會來做親人。若有無歡喜的代誌，愛想起古早人的智慧：「相分食有賰，相搶食無份」。先小讓--一下，先檢討調整家己的缺點，包容別人做無好的所在，特別是對咱上親的人，咱閣較愛共上好的笑容佮態度留予in才著。當當(tng-tong)咱有退一步，對方嘛會感受著咱的好意，人佮人的鬥陣就會愈來愈峇(bā)，生活愈來愈好。來成做一个有福氣的人，過幸福的人生，咱互相勉勵求進步喔！
線頂完整的台文通訊BONG報 379期，2025年10月出刊 雜誌內文
