看重家己的進步, 免驚毋著~

這是昨昏透早寫予一个3年學生的一寡鼓勵的話,

雖然出發點是針對伊所寫,
毋過對咱所有的人,尤其是對所有的學生囡仔攏通用!

人生的過程當中,絕對毋是干焦"零分"佮"一百分",
對零分到一百分當中, 猶有足濟無仝款的分數來代表咱認真進步的過程,
親像十分, 二十, 五十, 六十, 八十, 九十, 九十一, 九十二, ...
無人一出世就啥物攏會曉，嘛無人天生就會曉騎跤踏車,
攏是愛跋倒足濟擺,愛經過足濟遍的練習才學會曉!
所以咱千萬毋通驚做毋著,毋通驚說毋著, 毋通驚寫毋著, 毋通驚袂曉對袂著人!

咱愛看著家己認真拍拚的好表現,
看著家己進步的所在,
相信家己會愈來愈進步,鼓勵家己，肯定家己~

所以我特別將這的話翕落來囥佇遮,
佮我所有的徒弟仔分享,
祝福逐家會當一工比一工閣較進步~

嘛希望所有的爸爸媽媽,
會當鼓勵咱的囡仔,
做代誌學物件, 毋免驚做毋著哦~