●佮逐家分享一寡我所看著的好資料 ~有任何想法,歡迎留話給我^^ ●文圖影音等相關資料，純教學分享， 若有侵權煩請留言告知，必立即移除，感謝您的包容與無私分享~
2025年8月16日 星期六
2025年8月13日 星期三
2025年8月3日 星期日
教菸害防制兼傳承台語(1140603 啟助到新光國小菸害防制學生心得分享）
非常感謝雅婷老師用心撥工整理學生囡仔的回饋單，我特別邀請我的細漢查某囝佮我鬥陣看in手寫的回饋單，細漢查某囝講：哇，in的字哪會攏遐媠，有一个佮我寫的字足成呢，in寫的內容是按怎來的？哪有法度寫甲遐完整？
我講：因為in上課攏真專心真用心，閣加上阿爸的上課方式真趣味，所以in當然就學著足濟矣！（總是愛佇家己的查某囝面頭前家己褒一下🤣）
我看著in寫的內容予我足感動，尤其是大部分的囡仔in的字毋若認真寫，字體閣足媠的，而且閣會當共in佇課堂學著的代誌抑是心情描寫出來，其中猶有幾若个有感受著：
我除了欲教in 菸害防治，嘛順紲咧推廣台語，真正足歡喜，in有共我想欲傳送予in的禮物收著。
所以邀請所有想欲推廣台語的好朋友，佇生活當中，咱會當有意識使用台語佮囡仔做伙來分享、交流智識，大部分的囡仔攏聽有(免驚in聽無)，in嘛會當感受著咱想欲傳承台語的心意喔~
最後再次感謝雅婷老師對我的肯定邀請，我才有機會來佮新光國小的囡仔交流，而且閣佇宣講活動了後辛苦整理資料佮分享，我才有今仔的資料佮逐家分享，真正足感恩的~💕
這馬咱就來看新光國小學生囡仔，上我的菸害防制課程了後的心得(請點圖片放大來看喔)，學生的回饋足精彩，請點下底的相片，一張一張欣賞喔~ (若是用手機仔看學生寫的內容，請將手機仔設定做會自動轉橫的，按呢看學生寫的字才會較大字較清楚喔)
若是看我的文章了後, 有一寡想法，歡迎你佇下面留話予啟助，多謝。💞
2025年7月20日 星期日
啟助擔任教育部113-114年本土語言意識培力宣講人員回流進階課程講師(高師大場)
真榮幸再次受著教育部的肯定邀請，繼續擔任教育部113-114年本土語言意識培力宣講人員回流進階課程(高師大場)的講師。 真感謝同學鬥相共翕相紀錄我一寡仔上課的相片佮簡報內容，請逐家點下底的相片入去看，簡報頂面的字，攏是真重要的提醒喔~
我將我過去佇學校，抑是日常生活中按怎去推捒台語做一寡分享，真歡喜我的分享對學員是有幫贊的, 下面是學員聽我的分享了後的一寡感受(請點圖片放大來看喔)。看著學員的回饋，我真感動，佮逐家做伙來分享~
最後用一張圖片邀請所有的人，鬥陣來講台語，鬥陣來做台語的傳教士~
若是看我的文章了後, 有一寡想法，歡迎你佇下面留話予啟助，多謝。💞
2025年7月5日 星期六
散文 | 廖啟助 | 聽〈阿母的話〉這首歌ê感動 (台文通訊 第375期 )
佮主唱兼吉他手阿達仔做伙翕相
ps. 下面文章的字若是黃色的字就是有超連結，有台語辭典的解說，歡迎點入去看喔~
聽〈阿母的話〉這首歌的感動
作者：廖啟助
自查某囝出世，我就想欲共「阿公阿媽講的話」好好仔傳予囡仔。有一擺，我無意中去聽著「農村武裝青年」佇成功大學「跤踏土地唱民謠」演唱會內面演唱的〈阿母的話〉這首歌，若親像是透過主唱兼吉他手阿達仔的喙來講出我的心聲。我這个做老爸的人，那聽阿達仔的分享目屎那流。你講敢有遮譀？無毋著，就是予我遮爾感動，請你沓沓仔聽我說明，是按怎我會遮爾仔感動。
我是佇台南龍崎大漢的庄跤囡仔，自細漢毋但厝內面人攏講台語，會使講是規个庄頭，甚至是規个鄉鎮的人攏是全台語咧佮人溝通接接，所以我就佇遮爾純的台語母語環境大漢。毋過，後來退伍了後到高雄教冊食頭路的時，身邊講台語的人無濟，有咧講的人，嘛是攏透濫華語咧講較濟，我無意中嘛開始綴in講華語。
歇睏的時轉來台南厝裡佮阿爸阿母抑是阿公阿媽開講的時，煞變做足濟台語語詞開始袂記得愛按怎講。講台語的時，喙舌攏會拍結、袂輾轉，愛停落來問序大人這个語詞按怎講，才有法度閣用台語講落去。所以差不多20冬前，我開始有意識提醒家己盡量用台語佮人接接溝通，來保持家己的台語能力。
因為蹛庄跤，序大人無特別注重我的課業，細漢的時攏咧𨑨迌，啊無，就是去田裡鬥相共較濟。加上厝內環境無好，無啥物教育資源，就算阮班干焦7个人，我的成績猶是按尾仔算來前3名較濟，我佇學校考試的成績一直攏無好！自國小差不多三四年以後，才意識著成績bái這項代誌，一直到讀大學的時，我對家己的表現，攏有真深的自卑！
佇民國99年彼冬的「國語文」競賽，我聽著教學組長講，目前「國語」的比賽項目，同事攏報滇矣，毋過台語演講這項無人報，敢有人欲來報名？啥物！我敢有聽毋著？全國的語文競賽，竟然有台語的比賽項目，閣拄仔好演講這項無人參加，我就青盲毋驚銃，殘殘主動去報名，代表學校比賽。
想袂到我頭擺去比賽，就予我得著全高雄市教師組的第一名，這對一个自細漢佇庄跤大漢、自卑的我來講，是有夠大的肯定佮鼓舞，講台語的庄跤囡仔嘛有出頭天的一工！自彼時開始，我叫家己愛疼惜台語，共咱的母語傳承落去，就按呢，我費心、用心教家己的囡仔講台語。
我足希望阮查某囝會曉講in阿公阿媽佮我講的話，所以自伊出世開始學講話，我就攏全台語咧佮查某囝講話；毋過阮太太的母語毋是台語，所以伊佮查某囝講華語。因為身邊大部分的人對阮查某囝講華語，干焦我這个老爸講台語，伊tsua̋nn變做無啥 愛講台語。為著欲繼續傳承台語，只要伊講一句華語，我就佇邊仔隨講一句台語，予伊知影這句華語若換做台語欲按怎講。
有一擺我為著欲教囡仔講台語，要求查某囝愛講台語，伊煞共我應講：「阮同學啊無人咧講台語，是按怎阿爸你就愛遐堅持叫阮講台語？」聽著伊按呢共我應，我的心內佮阿達仔仝款，煩惱阮查某囝是毋是認為「講母語是一項真見笑的代誌」，感覺「是按怎咱兜講的話會佮人無仝？」
太太看阮舞甲爸仔囝起衝突，無愛看阮拍歹感情，伊開喙講：「是按怎你愛遐堅持叫囡仔講台語？我嘛無咧講台語，毋是仝款過了好好？你為著欲教囡仔講台語，舞甲爸仔囝相罵，按呢敢有必要？敢有價值？」後來我只好讓步，無閣堅持叫囡仔一定愛開喙講台語，干焦用好喙、用參詳、用姑情的方式，叫in盡量會加講寡台語，我仝款家己一个人堅持講台語予in聽。
長期落來兩个囡仔猶是真罕得佇我的面頭前講台語，坦白講，對我這个逐工想欲共母語傳予in的老爸來講，心內一直攏是傷痕，痛甲無人知，身邊的人攏無法度體會佮了解，甚至予我感覺心肝若像有一部分已經強欲焦去矣！為著欲予囡仔有法度來做伙講台語，我嘛捌去請教幾个教授抑是其他資深的台語老師，問in有啥物撇步通來改善這个狀況。
In予我的答案佮建議攏差不多是：叫我寬寬仔來、莫急嘛莫勉強囡仔一定愛按怎，因為「硬挽的果子袂甜」，相信時間一下久，囡仔的表現自然會改善。看著遮濟教授佮老師攏按呢共我鼓舞佮建議，我嘛只好放下，叫家己順其自然，慢慢等待花開的彼工。
我繼續堅持逐工佇囡仔身邊佮in全台語講話，嘛做模範予我的囡仔看，一直充實家己，讀台文提專業級的認證、去參加演講比賽、寫文章投稿、參加教育部辭典編輯培訓、本土語言意識培力培訓、做宣講師、四界去演講、到真濟縣市做評審、做伙去演台語廣播劇、參加台語有聲冊錄音，尾仔甚至改途做台語老師。我一直關心、鼓舞身邊的人鬥陣講台語，會使講規个心攏佇傳承母語頂面。
囡仔看我做這爾濟台語工課，應該知影我向望共母語傳落去。大漢查某囝捌代表學校參加台語演講比賽，甚至佇國中的時捌提著市賽第三名。伊去參加教育部B卷的台語認證考試，完全無準備，一擺就通過B1中級，甚至差10外分就到B2的程度。細漢查某囝嘛有代表學校去比台語朗讀，學校的台語老師嘛共我呵咾講伊是in班台語課表現上好的學生。看著兩个囡仔的表現，我知影我這个阿爸平常時逐工對in講的話，in攏有囥佇心肝內佮頭殼底。
這馬聽著〈阿母的話〉這首歌，予我想起大漢查某囝有一工佇line寫予我訊息，伊講：
恭喜阿爸你的台文寫作投稿又閣錄取矣😚！
我感覺厝內面人會當做伙分享歡喜的代誌是足讚的~
純文字沒啥溫度，毋過我發自內心替阿爸歡喜喔~
雖然我平常時仔攏無咧講台語，
毋過我支持你對台語的貢獻和參與。
加油~衝衝衝❤️🔥❗
你定定鼓勵我，所以我嘛欲替你加油！
想起查某囝這ê共阿爸鼓舞的話，予阿爸知影，你袂感覺阿爸對你講母語是見笑代，嘛袂感覺講阿爸一直咧講台語會予你感覺真歹勢。你閣支持阿爸去參與對台語有貢獻的種種活動，阿爸有沓沓仔去感受著，原來我過去佇恁的心內tiàm的台語種子，嘛已經慢慢咧發穎開花矣！
若是看我的文章了後, 有一寡想法，歡迎你佇下面留話予啟助，多謝。💞
線頂完整的雜誌內文， 請點台文通訊BONG報 375期，2025年6月出刊 的超連結來欣賞喔~
2025年6月10日 星期二
1140603 啟助到新光國小菸害防制宣導 + 好康報報
至底啟助是按怎進行這節「菸害防制」的課程，對咱的學生囡仔敢有實際的幫助，咱來看新光國小陳雅婷老師的分享介紹~
●同場加映： 啟助到光武國小 菸害防治制宣導+學生回饋1140526 (請點左邊 / 上面 看啟助老師到光武國小 上菸害防治的 學生課程回饋)
●好康報報 看完了上述的分享，若有希望啟助老師可以到貴校進行宣講的話，
●好康報報 看完了上述的分享，若有希望啟助老師可以到貴校進行宣講的話，
歡迎撥電話到四維國小 3348199 轉分機 320 與我聯絡
高雄市衛生局現在 還有 菸害防制宣講 額度可申請，
各校只要有意願來電或來信申請(最慢不超過8月底)，
心衛中心都還是會同意各校申請菸害防制宣導補助喔，
每校最多可申請三節課補助、 每節課有１０份超豐富的禮品
每堂課成果只要交４張照片、請學生寫問卷收回。
鐘點費憑證都已幫忙打好了， 只需印出即可。
高雄市政府衛生局 社區心衛中心
專案助理 吳青育 敬上
電話：(07)713-4000#1635
歡迎大家向衛生局心衛中心提出申請.
2025年6月9日 星期一
生活台語化 台語生活化的實踐~賀4年級黃群皓得著 高雄市情境式演說初賽第一名
雖然我關心推捒台語真濟冬矣，毋過因為過去攏是教資優班抑是社會科，所以雖然捌鬥相共指導學生，毋過人數並無濟，若是親身正式掛名落去指導學生參加台語演講的學生，今年可能只是第3个抑是第4个學生爾爾。
今年的指導學生，是一个4年的同學， 年紀雖然有較細，毋過因為學生的厝內面人有配合， 規家伙仔盡量營造出台語家庭的環境，加上學生肯練，家長用心配合要求訓練，以及導師鬥相共，才有今仔日的好成果！
看著學生會當提第一名，嘛是我指導學生演講以來第一个提著第一名的學生，雖然只是初賽，毋過我家己比學生閣較歡喜，表示我主張的「生活台語化、台語生活化」的實踐是真正對台語能力有真大的幫贊！向望佮學生以及家長繼續拍拚，繼續佇生活中講台語、用台語甚至是寫台文，累積家己的台語實力，佇後面的比賽得著好成績，來證明「生活台語化、台語生活化」的實踐理念重要性！
若是看我的文章了後, 有一寡想法，歡迎你佇下面留話予啟助，多謝。💞
2025年6月5日 星期四
18 鼓舞的力量│廖啟助│113年全國語文競賽-(教師組) 台語朗讀文章
113年全國語文競賽-台語朗讀文章(教師組) 出處 佮下載的所在 https://reurl.cc/qGR6qg
人人攏需要肯定佮鼓舞，有肯定有獎勵，就會予人愈有動力認真拚落去。真感謝評審老師的肯定，有錄取我的文章，而且閣有予教育部選用佇113年全國語文競賽教師組的台語朗讀文章內面，這是對我佇台語領域學習的過程當中，真大的肯定。我抱著感恩的心、歡喜的心，佮逐家分享我這篇作品，希望所有有讀過我這邊文章的好朋友，攏會當來鼓舞佮肯定咱身軀邊的人，毋管是咱的太太、翁婿、序大人、囡仔、學生、同事、厝內面人抑是朋友，透過《鼓舞的力量》，予咱每一个人會當愈來愈好愈進步。
18 鼓舞的力量
作者：廖啟助
下課欲轉去辦公室的時，有一个學生囡仔對運動埕行過來對我講：「老師，我足希望下晡的母語課閣是你來共阮上課。」話講了，彼个查埔囡仔就走去矣。聽伊按呢講，
予我想起頂禮拜，因為同事請假，教務處拜託我去代課的情景。
我上課的時，攏愛鼓舞囡仔開喙，毋管講了好抑是講
了無完整攏無要緊，甚至講毋著，只要伊有表示意見、參與討論，我就會加分，因為敢開喙抑是上課專心有參與活
動，就值得咱共伊鼓勵肯定，所以囡仔的成績我定定攏拍百外分，因為我相信決定分數的人是學生家己，毋是咱做老師的人。只要伊肯骨力拍拚，一百分絕對毋是伊人生的界限。嘛因為這个緣故，所以學生囡仔上我的課攏會感覺輕鬆閣有成就感，誠佮意上我的課。
阮查某囝定定練球的時喝忝，揣理由欲歇睏，所以下晡我刁持走去查勤，看伊敢有咧認真練球抑是走去摸飛。教練共我講：「恁查某囝無地嫌矣啦，因為足少有查某囡仔放學了後欲閣留落來練球，而且我見擺叫伊愛改的動作，伊攏有足認真咧練！」
聽教練按呢講，予我聽著規个心情攏好起來，原來阮查某囝的表現佇教練的心目中是遐爾仔好；原來我這个做老爸的人，過去攏用毋著方法，明其都愛伊變好，落尾煞攏去掠伊做無好的所在，莫怪伊佮我攏感覺足鬱卒的，愈
來愈懶屍。
透過彼个學生囡仔對我的鼓舞，閣有教練對阮查某囝的肯定，予我這个平常時無閒甲若干樂的人，雄雄又閣感覺充滿活力，嘛予過去一直感覺家己底蒂無夠在，毋敢去教母語課的人，這馬更加有信心來教課，順紲予我會當去看重家己的囡仔。所以毋管咱是做老師、做序大人，抑是
平常時仔佮人鬥陣，咱攏愛去揣著別人的優點，用鼓舞的話語來佮人交流。人若聽著咱的肯定、呵咾，就會閣較有信心，願意為未來拍拚，咱家己嘛會愈進步，因為「送花予人，手嘛會芳」，這就是鼓舞的力量！
01.下晡ē-poo下午。
02.查埔囡仔tsa-poo gín-á對年輕男孩的泛稱。
03.開喙khui-tshuì開口說話或是表明心意。
04.毋著m̄-tio̍h不對。
05.百外 pah-guā一百多。
06.喝huah大聲喊叫。
07.忝thiám 疲累。
08.揣tshuē/tshē
尋找。
09.歇睏hioh-khùn休息、歇息。
10.刁持tiau-tî故意、存心。
11.摸飛moo-hui摸魚。
12.恁lín你的。
13.查某囝tsa-bóo-kiánn女兒。
14.見擺kiàn-pái每次。
15.遐爾仔hiah-nī-á那麼。
16.掠lia̍h捕、抓。
17.懶屍lán-si 懶洋洋。倦怠、無精打采的樣子。
18.干樂kan-lo̍k陀螺。
19.底蒂té-tì根蒂。根本，基礎。
20.在tsāi穩。指東西穩固或人穩重。
21.這馬tsit-má 現在。
22.順紲sūn-suà順便。
23.序大人sī-tuā-lâng父母親。
24.鬥陣tàu-tīn人與人之間交際往來。
兒童生活教育動畫 台語版彙集 共110 集
【台文→請用台語唸下面寫的字, 多謝~】
這是過去足有名的生活教育短片動畫，真感謝善心單位，特別將華語版轉做台語配音，予(hōo）老師佮咱的囡仔除了學習相關的品德教育，閣會當用台語來學習，真正足讚的!
邀請所有重視學生囡仔的品性、品德佮生活教育的老師佮家長，做伙來欣賞。
每一塊影片，平均是5-7分鐘，袂（bē）予囡仔看傷（siunn）久的影片，
做老師抑是序大人，閣會當針對每塊影片的內容來指導囡仔按怎講這句台語抑是其中的台語詞，
所以我個人真推荐幼稚園佮國小的老師抑是家長，
會當tshuā囡仔做伙來看下面的影片，
一面看影片學台語，一面學相關的生活教育佮品性，真正是一兼二顧，讚啦~
非常歡迎你，分享予你的厝內面人 朋友 學生家長喔~
2025年6月4日 星期三
教育部臺灣台語動畫網 介紹
網站介紹 https://twbangga.moe.edu.tw/classification
教育部為推動臺灣台語並提高全民學習興趣，於106年起即規劃進行「臺灣台語卡通、動畫字幕製作及配音工作計畫」，祈盼能為國民提供貼近生活且寓教於樂的臺灣台語學習資源。
除先前已製作之「貝貝生活日記」、「少年阿貝GO!GO!小芝麻」、「櫻桃小丸子」、「九藏喵窩」、「卡滋幫」、「馴鹿超人傑若米」、「我的泰山爸爸」、「天地創造設計部」及「藥藥欲試──進擊阿茲海默」、「小貓巴克里」、「觀測站少年」、「九藏喵窩日常篇」、「GO!GO!原子小金剛第1-26集」、「工作細胞！！強菌來襲！人體腸道大騷動！」與「異世界藥局」外，又再製作6部卡通。
其中「快樂小丸日記」故事內容活潑，且與家人、朋友互動有關，適合幼兒園階段之學齡前兒童觀賞。
「GO!GO!原子小金剛第27-52集」則可了解大自然的奧妙與機制，適合小學階段學子欣賞。
「工作細胞第一季」及「銀之匙第一季」二部分別涉及到生理學、醫學和農業、畜牧業領域，劇情內容富含學科知識；而「孤獨搖滾！」及「元氣囝仔（案：元氣囡仔）」則能隨著主角們感受心靈成長與友情的可貴，上述四部卡通極適合國、高中生階段學子學習聆賞。
我們期待透過多元且不同於教科書的學習素材，讓民眾體認到「母語學習」其實可以融入生活裡，也鼓勵更多的家庭一起進行母語親子共遊、共玩及共學的新體驗。
資料來源：https://twbangga.moe.edu.tw/info
2025年5月31日 星期六
啟助到光武國小 菸害防治制宣導+學生回饋1140526
【台文=》請用台語唸】過去的我，因為做生教組長，所以有機會接觸著菸害防治的研習課程，去參加研習了後，予我深深感受著，原來食薰(抽煙)對咱的身體會造成遮大的傷害，所以我轉來學校了後，就開始規劃設計課程，佇我的學校做宣講，因為聽過宣講的導師佮學生的反應攏誠好，所以我就主動向衛生局建議，希望有機會會當去其他學校，分享我的課程予其他學校的學生知。後來衛生局有將通過研習而且閣願意到其他學校宣講的講師名單做整理，予全高雄市的學校通來申請。真歡喜嘛真感謝光武國小李老師的邀請，予我有機會會當開始去外校宣導菸害防治，而且閣用心記錄我上課的過程，以及佮我分享學生用心所寫的問卷，真正足感恩李老師來鬥相共佮付出。
光武國小的學生真優秀，除了上課認真學習，嘛真大方回答我的提問，下課了閣會當將所學著所感受著的，用文字詳細分享出來，想袂到我的課程會當予囡仔遮大的影響佮佮意，尤其這閣是我頭一擺去外校做菸害防制的演講，真正是予我足大的鼓舞佮肯定，所以我特別將上課的過程佮學生的回饋整理出來佮逐家分享，若是其他學校有需要啟助去宣講分享，隨時攏歡迎佮我聯絡喔~
2025年5月20日 星期二
散文 | 廖啟助 | 參加霹靂盛典演唱會ê感想 (台文通訊 第373期 )
作者：廖啟助
細漢ê我，看藏鏡人、烏白郎君、史艷文、秦假仙、荒野金刀獨眼龍，聽〈苦海女神龍〉、〈粉紅色的腰帶〉遮ê歌大漢。
毋過後--來，因為去外位讀冊無時間，所以布袋戲就無閣看--落-去，嘛因為無看霹靂相關ê節目，我想講我佮霹靂無熟，所以阮學校有報名抽獎送「霹靂盛典」演唱會門票ê活動，我就無去鬥鬧熱，想講共機會讓予別人。想袂到隔轉工一位家長專工敲電話予--我，講伊拄仔好有門票，伊知影我對台語真關心，所以特別留票欲送予--我，真正是足感心--ê。
看著家長遮熱心，我後--來想想--leh，講家己是台語人，結果煞無來參加霹靂盛典ê演唱會實在是講袂過，我想這應該是天公伯-仔ê安排，所以我就專工撥工來--矣。
入來到現場，看著坐甲插插插ê觀眾，我量其約共估計可能上無有3、4,000人，尤其是坐佇我邊--仔 ê人，差不多攏30 捅歲，每一首歌攏會曉唱。而且看in激動ê心情，喝咻甲有夠大聲，唱甲有夠熱情，予我深深感受著in對霹靂癡迷ê心，嘛予我對台語ê文化傳承閣有一點點仔向望。
規場ê表演攏真精彩，其中我感受上深--ê是聽西卿唱歌，一--來是伊唱我細漢愛聽ê歌，二--來是伊已經72歲--ah，猶閣有法度唱現場--ê，而且聲線聽--起-來猶真有氣力，元氣十足，氣色看--起-來嘛猶真好，予我非常敬佩。
毋過予我感覺可惜--ê是——大部份歌手攏講華語，kan-na一位查某歌手模仿豬哥亮講幾句仔台語，就無--矣。連荒山亮這位有leh 佇電視頂做台語節目主持ê歌手，嘛是講華語共逐家sio借問。猶閣有現場ê主持人嘛仝款kan-na講華語來主持！佇台語布袋戲ê演唱會，結果除了唱歌以外，賰--ê 攏講華語，真正予我感覺真失望！所以尾--仔我感覺我已經看袂落--去--矣，就先走--矣。聽其他ê朋友講，佇上尾--仔謝幕ê時，荒山亮有用台語表達伊ê感謝，毋過其他ê歌手就若親像無法度用台語來表達。
我想，真有可能主辦單位佮這-ê歌手，應該是無台語tih-欲消失--去ê危機意識，而且真有可能，in家己佇日常生活中，嘛攏真罕得用台語來佮人開講tsih接，所以真慣勢佇台仔頂就是用華語來sio借問。
若是主持人kah所有ê歌手攏有台語傳承ê危機意識，平常時有leh講台語，就會當好好仔把握這擺ê機會，tī現場用台語來kā所有ê人sio借問，佮台跤ê觀眾朋友用台語開講，鼓舞逐家做伙來講台語，予愈來愈濟人會曉講台語、願意講台語，予台語會當繼續傳--落-去，予台語大pha尾。
按呢布袋戲敢毋是會當予愈濟人來佮意，嘛會當予愈來愈濟人kah意來唱台語歌--leh？若無，等甲真正攏無啥人leh講台語ê hit个時陣，閣賰偌濟人ē想欲來看布袋戲？閣賰偌濟人ē想欲來唱台語歌、買台語專輯，到時敢閣有台語ê市場？
作者註：寫tī 2024年10月20，記錄高雄海洋音樂館霹靂盛典演唱會ê感想。
線頂完整的台文通訊BONG報 373期，2025年4月出刊 雜誌內文， 請點下底的超連結來欣賞喔~ https://tsbp.tgb.org.tw/2015/05/e_93.html
訂閱：
文章 (Atom)