圖文出處：https://tsbp.tgb.org.tw/2015/05/blog-post_80.html#more
【來捐血兼鼓舞護理師講台語】 (全台文漢字版)
廖啟助
厝邊的消防局拄仔好有捐血的活動，當然愛來鬥相伨。護理師問我基本資料，因為我攏台語回答，所以伊嘛加減用台語佮我溝通。
問了後，開始抽血的時，我特別向護理師呵咾講：「你的台語講了足好聽，應該愛加講一寡仔予民眾聽。」伊歹勢仔歹勢講：「其實我的台語講了無kài好！」我閣共鼓舞講：「頭起先，講袂siann輾轉是足四常的代誌，毋過你講台語的聲音足好聽，只要有捷捷講，一定會當愈講愈順，愈講愈好。」伊應講：「是啦！」
紲落去，伊繼續佮其他的民眾服務，毋過仝款用中文來問問題！
我就繼續揣話題佮伊開講，我問伊講：「恁過去佇護理學校上課，恁敢有特別是去學「醫學台語」的課程？」伊講：「無！」
按呢恁較早去病院受訓抑是食頭路的時，老師抑是學姐敢有鼓舞恁愛加強台語，愛盡量加講寡台語，按呢較有法度來服務一寡序大長輩的患者？」
伊應講：「嘛是無，佇護理學校從來無任何老師叫阮愛講台語，畢業了後，到病院上班，身軀邊仔的護理人員嘛攏是講中文較濟，差不多攏無人咧講台語，除非有患者伊是講台語的人，按呢阮才會用台語來回答伊！」
「我的台語是細漢聽厝內面人咧講所學的，佇學校除了佇國小的時陣，有上過台語課，其他的學校攏毋捌有上過台語課，毋過佇國小的台語課，老師是教羅馬字，講了足奇怪，所以嘛無啥認真咧學台語。」
我應講：「有可能彼當陣老師解說你聽較無，所以才會感覺老師教的羅馬字真奇怪！」
我閣問講：「你敢有囡仔矣？」伊講：「有啊！」
我講：「你敢有咧佮你的囡仔講台語？」
伊講：「我有捌佮伊講過台語，毋過伊攏無欲佮我講台語，尾仔我就煞煞去，無想欲閣佮伊講台語矣。」
我講：「囡仔有按呢的反應是足正常，因為伊聽了無夠濟，自然伊就袂曉講，加上伊的朋友同學攏無人咧講，當然伊就無想欲講！毋過，只要你有繼續佮伊講，伊一定會當加吸收著真濟台語，就親像你細漢的時，因為聽著厝內面人咧講台語，你這馬才有法度來講台語！所以咱絕對袂當放棄來佮咱的囡仔講台語喔！」
伊講：「確實是按呢無毋著！」
紲落來，我有聽著伊開始加減佮邊仔欲捐血的民眾開始講寡台語矣！
我500cc的血已經有夠額，所以我就先坐佇邊仔竭睏。
尾仔我閣佮這位護士小姐講，其實是刁工欲講予所有佇捐血車頂面的民眾佮其他的護理師做伙聽，我講：「佇咱台灣，尤其是出社會，若是會曉講台語，絕對是加足方便有利，所以咱愛繼續講台語予咱的囡仔聽，對in未來的發展加真有幫贊喔！咱鬥陣來講台語，多謝!」
伊講：「好，我知影，多謝你！」
紲落去我就離開捐血車矣。
看著我的雞婆性，予這位護理師開始加減講台語，嘛回答我講，伊倒轉去厝會佮伊的囡仔講台語，予我真歡喜，所以推捒台語，免拍勢，免揀所在，嘛毋免是愛去做老師才會當來推捒台語，只要咱有心，隨時攏會當鼓舞咱身軀邊仔的人鬥陣來講台語喔~
【來捐血兼鼓舞護理師講台語】 (台羅+漢字版)
厝邊ê消防局拄仔好有捐血ê活動，當然ài來tàu sio-thīn。護理師問我基本資料，因為我lóng用台語回答，所以伊mā ke減用台語kap我溝通。
問好了後，開始抽血ê時，我特別kā護理師呵咾講：「你ê台語講了tsiok好聽，應該ài ke講--一-寡-仔hōo民眾聽。」伊歹勢仔歹勢講：「其實我ê台語講了無kài好！」我koh kā鼓舞講：「頭起先，講bē啥liàn-tńg是tsiok sù常ê代誌，m̄-koh你講台語ê聲音tsiok好聽，只要有tsia̍p-tsia̍p講，一定ē-tàng愈講愈順、愈講愈好。」伊應講：「是--lah！」
Suà--落-去，伊繼續kā其他ê民眾服務，m̄-koh仝款用華語來問問題。我就繼續揣話題kap伊開講，我問伊講：「Lín過去tī護理學校上課，kám有特別去學 “醫學台語” ê課程？」伊講：「無！」
「Án-ne lín khah早去病院受訓iah是食頭路ê時，老師iah是學姊kám有鼓舞lín ài加強台語，ài盡量ke講寡台語，án-ne khah有法度來服務一寡序大、長輩ê患者？」
伊應講：「Mā是無，tī護理學校從來無任何老師叫阮ài講台語，畢業了後，到病院上班，身軀邊--a ê護理人員mā是講華語khah濟，差不多lóng無人leh講台語，除非有患者伊是講台語ê人，án-ne阮tsiah ē用台語來回答--伊。我ê台語是細漢聽厝內面人leh講所學--ê，tī學校除了tī國小ê時tsūn，有上過台語課，其他ê學校lóng m̄ bat上過台語課。M̄-koh tī國小ê台語課，老師是教羅馬字，講了tsiok奇怪，所以mā無啥認真leh學台語。」
我kā講：「有可能hit-tang-tsūn老師解sueh你聽khah無，所以tsiah ē感覺老師教ê羅馬字真奇怪。」
我koh問講：「你kám有囡仔--ah？」
伊講：「有--啊！」
我講：「你kám有leh kap你ê囡仔講台語？」
伊講：「我有bat kap伊講過台語，m̄-koh伊lóng無beh kap我講台語，尾--à我就煞煞--去，無想beh koh kap伊講台語--ah。」
我講：「囡仔有án-ne ê反應是tsiok正常，因為伊聽了無夠濟，自然伊就bē-hiáu講，加上伊ê朋友同學lóng無人leh講，當然伊就無想beh講。M̄-koh，只要你有繼續kap伊講，伊一定ē-tàng ke吸收著真濟台語，就親像你細漢ê時，因為聽著厝內面人leh講台語，你tsit-má tsiah有法度來講台語。所以lán絕對bē-tàng放棄kap lán ê囡仔講台語--őo！」
伊講：「確實是án-ne無m̄-tio̍h！」
Suà--來，我有聽著伊開始ke減kap邊--a beh捐血ê民眾開始講寡台語--ah。
我500cc ê血已經有夠額，所以我就先坐tī邊--a歇睏。
尾--à我koh kap tsit位護士小姐講，其實是刁工beh講hōo所有tī捐血車頂面ê民眾kap其他ê護理師做伙聽，我講：「Tī lán台灣，尤其是出社會，若是ē-hiáu講台語，絕對是ke tsiok方便有利，所以lán ài繼續講台語hōo lán ê囡仔聽，對in未來ê發展ke真有幫贊。Lán鬥陣來講台語，多謝！」
伊講：「好，我知影，多謝--你！」
講了，我就離開捐血車--ah。看著我ê ke-pô性，hōo tsit位護理師開始ke減講台語，mā kā我講，伊倒tńg去厝--裡ē kap伊ê囡仔講台語，hōo我真歡喜。所以tshui-sak台語，免拍勢、免揀所在，mā m̄免是ài去做老師tsiah ē-tàng來tshui-sak台語，只要lán有心，隨時lóng ē-tàng鼓舞lán身軀邊--a ê人鬥陣來講台語！
線頂完整的台文通訊BONG報 361期，2024年4月出刊 雜誌內文，請點下底的超連結來欣賞喔~
https://tsbp.tgb.org.tw/2015/05/blog-post_80.html
